«حرف» تنفرد بنشر أحدث قصائد جمال بخيت: «البدر النوبى»
البدر النوبى محبوبى
من سُمرة نيلى وجنوبى
أعشقه وأفتش ف جيوبى
ما ألاقيش غير قلبى ودقاته
__
أهدى له القلب وأدقدق له
على باب الحب وأزقزق له
أتمعشق فى جماله وعقله
__
بيته المتلون .. متلون
من ورد الحب .. ومتكون
من غربة .. والمولى يهون
مشوار الصبر الأيوبى
__
راحل ف الغربة وقال راجع
ارحلى عن ليلى يا مواجع
ولا يوم عن حبه ح اتراجع
ح ابعت له عيونى فـ مكتوبى
___
البدر النوبى اللى بحبه
أجمل أيامى كانت جنبه
ليه ينسى فـ البعد حبايبه
مع إنه هوايا ومحسوبى
___
أنا شايله فى قلبى وفـ الننى
وعيونه الحلوة تجننى
مش ح اقبل يوم يبعد عنى
ويسيب الحزن على دروبى
__
إزاى يا حبيبى ما تفهمشى
أشواقى فـ عيونى ورمشى
أتعذب وانت ما ترحمشى
وتقول لى اقبلنى على عيوبى