أول يوم غربة
أول مكالمة
قال آلووو
الوقتى آخر دوسة على أرض الوطن
والله أعلم لسه دوسة متعنالى ولا لأ
كان فى كلام محشور فى روحى من زمن
سايب فى روحى ألف شق
يكفيكى شر القهرة لما تزور رجال
غلبة ديون بتحز فى الليل كل بال
يكفيكى قُصر الإيد وكسر النِفس
قادر يبدل حال لحال
أنا عمر بُعدى فى الكلام وأنا كنت جنبك
مكنش كُره ورفض لوجود اهتمام
كان طرف عينى بيخزى يجى يوم فى عينك
والشيلة شيلتك اسمى بيكمل مكان
ورقبتنى محنية خجل
واتحجج إنى بقرأ فى الشاشة بيان
حبيت أقولك لو صحيح الغربة جاحدة
أنا بعدى عنك بيت ملوش ولا يوم حيطان
آخر كلامى...
نفس بس تكونى راضية
فقرى خلانى بعيب
نفسى أحجز أوضة فاضية
جوا قلبك لما أغيب
خلى بالك من ولادنا
كبرينى جوا عينهم
عرفيهم أقسى كلمة إن أرد وأقول مفيش
عرفيهم إن فعلًا مابإيديش
عرفيهم إنى فعلًا مابإيديش.