جمال بخيت يكتب: بُنى الإحساسُ على خمسٍ
بُنى الإحساسُ على خمسٍ
أنتى
وحنانِك
وجنانِك
شعللة الهوى من فيضانِك
والروح الحرة ف أحضانِك
بُنيت أشواقى على خمسٍ
أنتى
وعيونِك
وشفايفِك
والشوق لحضورِك
ولطَيفِك
والشِعر المتقال ف لطايفك
بُنيت
مملكتك فى نهارى
ف رحيلى
وف طول مشوارى
ف النظرة
عليكى بتدوّر
ف الكلمة
معاكى
بتنوّر
ف اللمسة لما بنتهوّر
واللمسة لما بنتجاوز
مش عاوز أعرف
مش عاوز
مين غيرك ممكن يبنينى
ويتمم ف الحب
سنينى
الفايت منها والآتى
بُنيت ف وجودك لذّاتى
بُنى الاحساسُ على خمسٍ
على خمسٍ
بُنيت أحلامى
أنتى
والعود المتسامى
وهواكى الطاير ف مسامى
والشوق الدامى
المتنامى
وفراغ الكون لما تروحى
بُنيت
على هزاتك
روحى
قلقانة وخايفة ونشوانة
ساكنانى
صبحت
ساكنانا
حضناكى
صبحت حضنانا
على عودِك تشدو لى بهمسٍ
بُنى الإحساسُ على خمسٍ