ده انسب وقت إني اغني

ده انسب وقت إني اغني

مع إن الليل فـ بلادي طويل

عشقان البعد خُطا حبيبتي

وغنايا يقرب .. شط البحر بنبع النيل

ضُمي الاوجاع على احزاني

فـ اسند على كتفك راسي وأميل

وآخد عفو من الدنيا

من حكم العشق فـ سجن الليل

ده انسب وقت إني اغني

مع إن الصيف فـ بلادي خريف

طب ليه يا بلادي يا مؤذيه

خليتي التربة فـ عين الطفلة رغيف

ورصاص الجندي فـ عين العيل 

جاكت صوف بيحول ..

 برد بلاده لنسمة صيف

ده أنسب وقت إني اغني

مع إن بعادك خلى الصمت يعلي الصوت

خلى الوتر اللي فـ عودي يعود مكبوت

خلاني كبرت وخلى الشيب يُملك راسي

واتعكز على ست سنين فاتوا بدون انفاسي

ده انسب وقت إني انادي

عـ الحلوة تخيط جرح ايديا فـ صوف كُمي

على دعوة جميلة فـ دمعة بتجرح عين أُمي

القلب إن عاد له الماضي إزاي هنعود احباب

والشوق إن زاد عن سنتين 

يحسب باقي العمر حنين كداب

خبي العيون يام العيون عسلي

وجع البعاد حرف حروف غزلي

ده انسب وقت إني اقطع

من قلبي خيوط كي تتغزلي

ده انسب وقت إني اغني

مع إن الخوف عرّى جبين الحُر وسابُه

يلعن مكتوبٌه ويرمي اللوم على أحبابُه

وده انسب وقت إني ادور

عـ الكدب فـ سطري الصادق والصِدق إن لامُه

قلت إنه .. ده انسب وقت إني اغني 

مع إنه .. مش انسب وقت إني اغني 

وبلادي الحرة بتوجعني

وحبيبتي اللي ضفرت الشِعر فـ خصلة شوقها بتبعد عني

مش انسب وقت إني اغني

لكن إيه يُملك قلبي الواحداني ؟

غير شوقي لحُسن حبيبتي وعدل بلادي وسِت أغاني ..

مش انسب وقت إني اغني ..

ده انسب وقت إني "اعاني" .