الإثنين 16 نوفمبر 2026
المحرر العام
محمد الباز

مزاولة أم كلثوم

حرف

«هـ أسيبك لـ الزمن» أغنية معروفة لـ الست أم كلثوم، غنتها أول مرة ٦ ديسمبر ١٩٦٢، وقدمت فيها تركيبة غريبة شوية، الكلمات لـ الشاعر الشاب اللى كان إلى حد ما جديد، اسمه يدوب ظهر من سنتين، المهندس عبدالوهاب محمد والألحان لـ رياض السنباطى الغنى عن التعريف اللى بـ يلحن لـ الست بقى له ما يقرب من ٣٠ سنة.

التركيبة غريبة مش بس علشان فرق السن والأجيال، إنما كمان لـ إن عبدالوهاب محمد كان مطروح بـ اعتباره نقلة من الست لـ مواكبة جيل الشباب اللى بدأ يتعود على حليم وشادية وصباح ونجاة الصغيرة، فى حين السنباطى أكتر واحد من القدام كلاسيكية ومحافظة على الألحان المسبكة بتاعة «زمان».

الغنوة دى نجحت كـ عادة أم كلثوم، والناس رددتها إنما تقدر تقول إن فيها مزاولة جامدة، اللى هو ما تعرفش تكون صورة عن صاحب/ صاحبة الخطاب فى الرسالة، وقبل ما نسترسل فى هذا خلينى أقول لك ملحوظة عن عبدالوهاب محمد.

الراجل دا من أكتر شعراء الأغنية المصرية اللى قدم «أفكار» جديدة، يعنى اعتناؤه طول الوقت بـ إن الموقف يبقى جديد سواء لـ ما قدمه مع ثومة أو غيره وصولًا لـ لطيفة، والمفارقة إنه الأغلبية الكاسحة من أغانيه على لسان واحدة ست، وبـ تغنيها مطربة مش مطربة، حتى أم كلثوم من النوادر اللى تغنى خطاب على لسان سيدة بـ شىء من الوضوح، فـ هو مهتم جدًا بـ سيكولوجية السيدات فى معظم ما قدمه من إنتاج. 

فى «هـ أسيبك لـ الزمن» إحنا طول الوقت عمالين نسمع نبرة استقواء من المتكلم، اللى بـ يخاطب الطرف التانى، اللى كان شريك، أو الإكس بـ لغة الأيام دى، وعمالة تقول لـ: إنت ضعيف وحالك عدم، وبـ تشكى، وبـ تبكى، والأيام جات عليك بـ الجامد، بس أنا بقى مفيش عندى رحمة ليك، مفيش غير معاملة بـ ما تستحق، مالكش عندى غير التشفى والمرمطة والبهدلة وقلة القيمة.

الكلام دا على مدار الغنوة من أولها لـ آخرها، حيلو!

حيلو.

لكن لما تركز، تلاقى مفيش الكلام دا أساسًا، زمن النص، كما هو واضح ولا يحتاج لـ تأويل، وهى لسه واخدة المقلب طازة، وهو لسه سايبها، أو عامل اللى خلاها تسيبه، فـ كل المذكور أعلاه دا ما حصلش، ومفيش أى معطيات أو إشارات أو مقدمات أو دلائل إنه حتى ممكن يحصل، يعنى مفيش أمارة تقول لنا ما يؤكد حدوث هذا أو حتى يخليه متوقع.

يا عينى، هى كل رهانها ع «الزمن»، بس كدا! الزمن!على اعتبار يعنى إنه لما الزمن دا هـ يدور، الأمور هـ تتبدل من تلقاء نفسها، وأكيد طبعًا هـ تتبدل فى اتجاه «العدل»، لـ إنه، زى ما إحنا عارفين، لا بد عن يوم محتوم تترد فيه المظالم، وكل واحد هـ ياخد جزاته، وأنا مش عارف الثقة دى جاية لـ الذهنية المصرية منين؟

مع إنه كل التجارب بـ تقول إنه الحياة مالهاش صيرورة حتمية، وصناعة أى لحظة مقبلة يلزمها حاجات كتير جدًا من جانبك علشان فى النهاية «ربما» تصل إلى ما تبتغيه، إنما فكرة إنه 

«غدًا

سوف يولد من يلبس الدرع كاملة

يوقد النار شاملة

يستولد الحق من أضلع المستحيل»

دا زيه زى الصبر، خيال، وكلام فى الشعر يدوب يتقال، الواقع إنه من كانت تغنى له الست غالبًا كمل حياته عادى، وزمان ولاده دلوقتى مسئولين كبار فى الحكومة، ومات وهو أصلًا مش فاكر هو شافها فين.