مكتبتي..
صبر «السحاب»
خلينى الأول أقولك إنى إمبارح قضيت اليوم بـ طوله مع مقطع «وصفوا لى الصبر» من أغنية ودارت الأيام: مأمون الشناوى، محمد عبدالوهاب، ثومة، يعنى واحد من لقاءات السحاب.
البداية كانت بروجكت المفروض ما ياخدش نص ساعة، إذ إنى سمعت هذا المقطع آلاف وآلاف المرات عبر خمسين سنة، لكن لـ أن البروجكت كان يستلزم سماع ثانية ثانية لـ أسباب تقنية، فـ كانت النتيجة إنى ركنت البروجكت على جنب، إذ إنه وكـ إنى بـ اسمع المقطع لـ أول مرة، فـ استعدته فوق الـ١٠٠ مرة، وهـ أقول لك اللى خرجت بيه وما ذكرتوش قبل كده لما اشتغلت ع الغنوة بـ صفة عامة.
المقطع ممكن تعتبره عملًا دراميًا مكتمل الأركان مكونًا من خمسة فصول، أو أجزاء:
الجزء الأول منه: مقدمة موسيقية تستغرق دقيقتين إلا ثانية، عبدالوهاب عامل فيها تصوير لـ«الصبر»، المقدمة ١١ جملة موسيقية، كل جملة فيها شحنة مشاعر مرتبطة بـ الصبر: فيه ترقب، أسى، قلق، توتر، حزن، ندم، اجترار ذكريات، مساحة تأمل، وكل ده متوقع ومفهوم «وإن كان تصويره هايل هنا» إنما المفاجئ بـ النسبة لى هو قفلة المقدمة القصيرة دى.
الواقع إنه لما كل ده يمتزج «الصبر مع القلق والأسى وما إلى ذلك» بـ يقود لـ غضب واضح، غضب من نوع خاص، مش غضب اعتراض، ولا غضب عصبية، ولا الغضب اللى بـ ينشأ عادة فى النزاعات. إنما هنا غضب من إننا محبوسين فى الوضع اللى يستلزم الصبر، يمكن يكون الغضب ده موجه لـ النفس قبل ما يكون موجه لـ آخر/ آخرين.
الجزء التانى: بعد المقدمة الموسيقية طبيعى نروح لـ النتيجة اللى بدأنا بيها الكوبليه من حيث الكلام، وهو إنه الصبر مش أوبشن، مش حالة قابلة لـ الاستمرار، حتى عمليًا ما ينفعش، لـ أنه فوق التحمل، فـ ده تمهيد لـ الجزء التالت الملىء بـ التفاصيل وتفاصيل التفاصيل.
مبدئيًا، الجزء ده أربعة أشطر مكتوبة كـ التالى كـ نص:
أهرب من قلبى أروح على فين
ليالينا الحلوة فى كل مكان
مليناها حب إحنا الاتنين
وملينا الدنيا أمل وحنان
مش صح كده؟
كلام بسيط مفيهوش حاجة لافتة غير حرف الجر «على» فى «على فين»، هـ اكلمك عنه كمان شوية، لكن تعالى نشوف عبدالوهاب وثومة خلقوا منها إيه؟
مبدئيًا الفارق بين الهروب والفرار، إنه الهروب هو رغبة فى إيجاد مقر يكون بعيدًا عن مشكلة ما، الفرار خاص بـ البعد عن المشكلة وخلاص «وغالبًا يصاحبه ذعر» فـ الهروب هو حالة بحث مش قاصر فقط على الابتعاد.
المشكلة هنا هو إننا فى دائرة من الهروب والهروب المضاد، يعنى إنت عايز تهرب من ذكرياتك مع شريكك فـ مهربك إلى الصبر، بس لما تجرب الصبر تبقى عايز تهرب منه، فـ ملجأك مش هـ يكون إلا إلى الشريك.
دايرة بنت كلب
عبدالوهاب عملها إزاى؟
مبدئيًا استبعد آخر كلمة اللى هى «حنان»، ومشى بـ الأشطر فى لحن دائرى معتمد على إيقاع الفالس، يعنى خلاها كده
أهرب من قلبى أروح على فين
ليالينا الحلوة فى كل مكان
مليناها حب إحنا الاتنين
وملينا الدنيا أمل....... ونقف
أمل! مرة تانية بـ تعجب
دا يودينا فين؟
يودينا إننا نعيد الكلام من أوله، الإعادة هنا مش من الست، دى من اللحن، اللى هو أمل.. أمل.. طيب أهرب من قلبى أروح على فين؟ الست هنا بقى تعمل إيه: آهة خفيفة قبل الإعادة الأولى تتصاعد مع كل إعادة.
بـ تعيدها كام مرة؟ قد ما تستحمل حضرتك، وبـ كل أشكال الأداء، وآهات بس، وهامينج بس، وبـ الآلات بس، وصولو بس، وحاجة تسحبك فعلًا، وتبقى مش عارف هـ نخرج من الدايرة دى إزاى.
أهى «حنان» بقى دورها إنها تقفل هذه الدايرة، بعد عدد من الإعادات، بـ تقف الست عند لام أمل «فوق العشر ثوانى فى هذا الحرف فقط» لـ نتذكر إنه الأمل كان يصاحبه «حنان» أمل + حنان= طمأنينة
يبقى إيه؟
يبقى بـ الظبط:
عينى ع العاشقين
حيارى مظلومين
ع الصبر مش قادرين
إذن مفيش أوبشن، روح لـ اللى يريحك حتى لو هـ يتعبك، ومن نافلة القول إنه لما خرجنا من دايرة الهروب والهروب المضاد لـ «عينى ع العاشقين» نقلنا المود خالص خالص، ومن الفالس لـ الواحدة ونص فى انتقال إعجازى.
عينى ع العاشقين كان الجزء الرابع من الملحمة، اللى هـ يقودنا لـ الجزء الأخير اللى بـ يشمل السنيو، اللى بـ تقول لنا فيه هى ليه رجعت لـ مجرد إنى «قابلته».
وأخيرًا، ممكن حضرتك تفكر هو إيه البروجكت اللى خلانى أرجع لـ المقطع إمبارح.
لـ الأسف، مش هـ أقول لك.
