نسمه هوا
نوفمبر بيودّع آخر نَسمة هوا
عَلى شكل دموع مرسومة عَ الخد
والبرد بيزُقّ بُبان اللي متغطي بالحُزن
ويِسيب اللي متغطي بصوف
ويرسم بُكرة سحابة تِمطِر
علشان تموت عيلة تحت الأنقاض
ويفرّق بين اتنين
ويعيّشهم العمر كله أَغراب
نوفمبر بيدوّر ف الأرض
ورق ناشف
يِغطي بيه عَ دمّ الشهدَا
ويحضن طفلين بيرسموا نجمة ف كُراسة
قبل ما تنده صوت القذايف
أو تِحضنهم فجأة رصاصة
بيرسمه نجما ف السما
والدم بيكمل الرسمه
عن طفلين
كل أحلامهم فسحة ومصّاصة
مركب ورق، عجلة وكورة
وصورة تكون فيها الضحكة
من غير أي شقوق
نوفمبر بيودّع آخر نَسمة هوا
على طفلين عمرهم عَدّى
ما بين موت وحروب
ما بين نصر ونَكسة
نوفمبر بيودّع آخر نَسمة هوا
عَ شكل دموع مرسومة عَ خدّ
طفلين…
بيموتوا من البرد ف غزة