زينه
قناويه يما وزغللت عين الولد
قناويه يما وخلخلت قلبه الوتد
فردت خطاها جوه قلبه
وزهزهت فيه الشجر
قلب كان مليان عبر
قلب كان قسو الحجر
اتشكلها كيف العجين
دلدقت منه الحنين
ونبتت فيه المشاعر
خلته حريف كلام
خلته يتقله شاعر
شفت وحده تشد عاصي
من المعاصي يروح يتوب
شفت وحده بنظره وحده
تسكرك من غير ذنوب
شفت وحده فــ أي حته
توزع الفرحه ببلاش
وحده انس لاي وِحده
وحده شافها قتيل فـ عاش
شوفتوا زينه ؟
مشوفتوهاش !
زينه ورده
ريحها يملي الكون بحاله
زينه مرسي
لاي طايش فـ الحياه وشادد رحاله
زينه لو تيجي فـ بالك
تشيل همومه تنسيهاله
زينه ارض ومال وجاه
زينه افضل طوق نجاه
زينه اهدي مكان تروحه
وسط زحمه الحياه
زينه مأمن
زينه مأوي
زينه لو زارت ضعيف يبقي اقوي
زينه شمسَ للدروب
زينه سلماً للحروب
زينه ان نظرت لعاصِ
يسبح الله يتوب
زينه قمر ونجوم وليل
زينه نسمه وهدوء ونيل
زينه لو دخلت متاهه
تبقي للتايه دليل 0