مِيوت_Mute

بفكر ابكي..

لأه ما تفكَّرش

بفكر ارجع..

لأه ما تهزرش

عليك فلوس يا حمار.. 

ما تتأخرش

وعليك لنفسك تبقى انت علاجها

والدنيا؟ لازم تمشي ورا منهجها

تحلم ب ريست تشم فيه أنفاسك

مكتوب عليك في النوم كمان تنهجها

وحيد تمامًا دون جواب ورسالة

فردة شراب منسيّه في الغسالة

مين يفهمك لما تقول تعبان؟

لغتك غريبة،

حتى دمك كمان

معناه شروق الشمس ”للبنجالة“

وحيد تمامًا دون ايدين بتناولك

حتى القطط ما بقيتش بتنونو لك

بقيت بتمشي ايديك ورا وقدام

وفريقك انت عملوا حيطة ل ”فاولَك“

”سارح في غُربة“ تحت رحمة ناس

تتمنى ترجع لو تشيل الفاس 

فيلمك ممل وعِشت مُخرِج فاشل

نفس السيناريو ومَط في الأحداث

مش قُلت غُربة؟ يلا شيل يا معلم

اِمنع لسانك يشكي أو يتكلم

وفّر قميصك والبسه في الراجعة..

شمس الخليج هتخلي جِلدك مِقلِّم 

الحسبة صعبة ولو رغيف العيش

رجّعني تاني عسكري في الجيش 

يا ”ابو البلد“ طمني عامل ايه؟

”هشوف واقولك“ فاتني وما قالّيش

ورا حلمي بجري ولا دي تشريفة؟

”ع العالي كيكا“ طلعت برج خليفة..

بصيت لقيتني في الشوارع بزحف

والشمس قاسية وقلبي خامتُه قطيفة

مفيش دموع في عينيك ولا بتلمحك

ما بقيتش زي زمان ولا تريَّحك

شوفلك طريقة جديدة عيَّط بيها،

بتموت في سِرَّك لو فُلان ينصحك

اصبر عشان ما تروحش فيها بلاش

في عيون حبيبتك فيه حاجات تتعاش

ارجع بنفسك سيب في ايدها عيدية 

ملعون عيدية طريقها ڤودافون كاش

بقيت بتشبه للتروس والمَكَن

لغتك إشارة وصوتك انت اتركن

أسف حبيبتي لازم اعمل ”ميوت“

عشرين نفر ويّايا جوا السكن