قهوجي 

قهوجي..شغلانتي سَقَّا وقِرْبِتي فوق الصينية
بَسْقِي كل الناس محبة وقلبي زي السكرية
رَفّي شايل من حناني ومن أمان الكون ده ميّة
شوب سحلب لونه ضحكة مزخرفه قُرب وبَراح
خَلطة سخنة تداوي كُحّة وتمحي م القلب الجراح
جنب مني ترزي رايق إيده تتلَف في حرير
رحت اوَدّيله المحوج شفت عنده راجل عجوز
جاي يطَرَّز قلب عيل
يبقا باين بَفْتة بيضة وتحت منها يداري غِل
يعني يبقا نار بتغلي بس ريحته نسيم وفُل
خيطه يبقا جَمر قايد واللي هيشوفه يحن
عقل صاحبي اتكَر خيطه والألم عالإبرة حَل
لَم بَكَر الخيط في درجه وقاله بره من المحل
رحت أسأله عن قماشته وعن سبب كرهه لسماه
إيه اللي خلاه يقص عمره و يمشي بيقطع هواه
إحنا مش تعابين في غابة جلدنا هَنْكُر فيه
إحنا جايين نِدِّي عَمْرَة لكام ماتور أو كام بوجيه
قالي دوق القِصة سادة وبعدها قول رأيك ايه
خدت ولّاعة آلامي وقولت ادَخّن ماضي جاي
غصب عني لقيت همومي عازفة نوتة نزفها ناي
فجأة شوفت شريط حياتي
بيتطلب علي مية بيضة بس فيه ريحة شياط
فافتكرت اني نسيت كنكة حياتي في فرن قلبي
عند وِلعة إحباطاتي وقلبي ما بَطَّل عياط
رحت فرن الإنسانية اسأل بكام عيش الوضوح 
قال لي محروق منّي مدفون جوا مقبرة الجروح
قالي عندي بقسماط مرشوش بِسِم
فطيرة حلوة عسلها هَم، أحلي كَيزَر حشو غِش
فينو مجروح قلبه هَش، قلت فيه حِنّية بايتة
قالي فيه قَسوة فريش
النار في بابوري حزينة وعيونه مسربة غاز
أنبوبة فرحي اهي فضيت وآلامي بتعزف جاز
الفرح كحول ايثيلي بيطير من جلدي قوام
والحزن طريقه لقلبي مرصوف ومفهش كمين
وان مرة الهوا فرحني حزني اتنفسه نيكوتين
والناس كالشاي أنواع ،خمسينة وسكر بره
كالقهوة زيادة ومُرَّة 
أما في أسواق الدنيا ،البيع لُهْ أصل وفصل
قلبك هيكون كالمِصفَة ،هتصبله فرح يخر
الحزن ده أصلاً بَكَرَة ،والدمع خيوط بتكر
وان كنت مُكَعَّب سكر، شايهم راح تشربه مُر
خليك دايما قهوتهم ،سادة ووريهم وش
واختار أبعاد فنجانك ،لَقّمُه بمعالق غش
قهوجي شغلانتي سَقَّا وقلبي فاير عالحياة
واللهْ ماهي فارقة سادة أو زيادة لو هنشربها بأذية 
يلا نرجع للمحل وقوله عايز جلابية 
لاجل ما تداري جروحك لما تنزف إنسانية