الجبل الأحمر
وأحنا في الجبل الأحمر
الجبل المقتول من صاحبه
والغرقان في الدم
عامل زي الروج عالشفه
زي المدبوح عالضفة
وبيصرخ، ولا حد يرد
ولا حد يمد
مسمومه الخطوه
ولا طير بيزور
ولا دابة تدور
وف أول شبر عليه
كاتبة الدولة
(محظور محظور)
إلا إحنا يا زوجتي
إلا إحنا
كنا الغرقه
ولا قشّه تنجّي
ولا قشّه دليل
زي السمكة في النيل
عايشه ف دموع الليل
إلا إحنا يا زوجتي
إلا إحنا
كنا الموتى
ف اكفان ماشين
وساعات نتمنى نكون
مانيكان مركون
ولا حتى جنود عاللوحه
وإن كنا
كنا هنبقى، رسمه ممسوحه
والليل هنا واعر
اوعر م الخوف اللي يلبش جتت أبو قلب حديد
أسود م الطرحه اللي بتلبسها الأم لفراق البِكر
والقمره تخاف لتجيه
وتطل عليه
وإن جات تبقى
أحمر م العين اللي اتكبت لفراق محبوب
والصوت
وصراخ الجبل اللي لا بيهدى ولا يبطل
وكأنه الكبت الساكن في قليب مغلوب
لكن ي حبيبتي
لو حد هيسألني
مين هو الجبل الأحمر
كنت هقول
وأفصح بالسر اللي اتقالي
واخون العهد
وأعرّف كل الناس
أي معنى الحب
أي معنى الشوق
أي معنى أن أنت عينيك تتاخد منك
وبتفضل ماشي لوحدك
تبحث وتدوّر
على أي بصيص
الجبل اللي إحنا عليه الآن
إنسان
إنسان مخلص
كان ماشي علي الكورنيش مره
وعينيه وياه
وقالت له اتمنى
واتمنى إنه يتباس بالروج الأحمر
وأنه يبنيلها مناها القصر
واتباس بالروج ليكون
الجبل الأحمر بمدينه نصر