بالعين والعقل

مش كل اللي تشوفه بعينك بيكون دايمًا هو المظبوط

ولا كل اللي أنت بتحلم بيه لازم تلاقيه على طول موجود

كل اللي فهمته عن الدنيا فيه منه كتير جدًا مغلوط

زي الأحلام.. تسعالها عشان تبقى حقيقة

زي الأوهام.. ممكن تتبدل فـ دقيقة

زي المخاليق.. مش دايمًا هتشوفها بريئة

مش كل اللي تشوفه بعينك بيكون دايمًا هو المظبوط 

فيه حاجات بيكون حواليها ضباب

وحاجات محسوسة وهي سراب

العين مش هي اللي بتدي الصورة الواضحة

دي ساعات مالهاش أصلًا إعراب 

وساعات بتكون غافلة بأشياء فـ حقيقة الأمر بتبقى خراب

وحقيقة الأمر بتبقى ظروف محفوفة فـ كل حالاتها صعاب

مش كل اللي تشوفه بقلبك بيكون بجماله ولونه الصافي

حتى الإحساس لو زاد جواك عمره ما هيكون أبدًا كافي

عمره ما هيحدد بين حاجتين

عمره ما هيفرق بين حالتين

بين حد نضيف أو حد سخيف

أو حد بيضحك عـ الجانبين

العين والعقل في رسم طريق أحسن رفيقين

أحسن فريقين هيلاقوا حلول 

لو تاهوا فـ سكة وأملوا وصول

ممكن يوصلوا لطريق هينجي في غمضة عين

فَـ بلاش تختار سكة قلبك من غير ما تدخل عقلك فيها

بالعين والعقل السكة الصعبة هتقدر حتى تعديها

وإن دخل الشك ما بين الإتنين والقلب اختار

اتأنى ووفق إحساسهم واختار رأي الأصدق فيهم

من غير ما تكسر مآديفهم أو تلغيهم

لا القلب هيقدر يبقى أدق فـ حسبة حالك وظروفك

ولا حتى العقل فـ نفس الحسبة هينهيهم

كل ما تحتار اختار الشيء بالعين والعقل

هتلاقي الصعب عليك بيهون وهيصبح سهل

وبلاش تنساق بغباء قلبك وتخوض فـ الجهل

كل ما تحتار اختار الشيء بالعين والعقل

هتلاقي اللي أنت زمان جاهله بتفسر شكله ومضمونه

بتفرق بين صعبه وسهله وبتهرب من أسر سجونه

في قاموس الدنيا مفيش حاجة تقدر تختارها بعين واحدة

مليون خفاش قادر يختار مش بشرط بنور جوا عيونه 

كل ما تحتار اختار الشيء بالعين والعقل

هتلاقي الصعب عليك بيهون وهيصبح سهل

وبلاش تنساق بغباء قلبك وتخوض فـ الجهل

كل ما تحتار اختار الشيء بالعين والعقل