التعريفة

بيتم الان 

تصدير الناس 

مع دفع جمارك ع الاحرار

بيتم الان 

نزع الانسان من قلب الدار

وبقينا ولاد نوح العاصين 

زرعين الغربة.. 

 حاصدينها دولار

الفقر استحضر دور سمسار 

و البحر بيبلع في الاحلام وكأنه طوفان 

12 ساعة دوام كامل 

العامل زهرة على الطاولة 

والدنيا ليلاتي تدوخ فيه

الدنيا بتختم تعريفه 

ممكن يتباع على نص جنيه

متغير جدا في الاحوال

مبقاش يتصور زي زمان 

صعبان على حاله هزيمته بتظهر في البرواز

من كتر ما عرقه اتلغبط ف الدخان 

بقى يعرق جاز

من كتر حرارة قلبه الشمس 

الخلق العايشة سنين جواه 

دابت منه 

الغربة الندلة اللي اتمناها  تعيش وياه

نشلت سنه!! 

قرر يرجع

لبلاده الفايته فقلبه حنين

لم القرشين لكن.. عطشان

قرر يرجع.. 

ملقاش النيل!! 

ملقاش غير تربة بتدفن ناس 

ملقاش الناس.. ملقاش غير كوبري عليه تماثيل

خبط على قلبه بهدة حيل 

مش معنى اننا عبينا الارض عيون بترول 

تنتج عملات 

مهي برضه ساعات هتنز دموع 

حولتوا البني ادم مشروع 

اروحنا بتخرج لما نجوع 

ونموت علشان فصلو الكبلات 

حطولنا الختم على الباسبور 

وكأنه عبور فوق البرزخ

لحظة ما تعدي حدود البيت

و تسيب مستقبل متشعلق في ادين بكره

تصبيرة تسد الجوع علشان 

الحلم بيتحول قرصه

قررت خلاص..

 هتخش اتاري الغرب تكون لعبة

لكن.. في الغربة الموت اخر فرصه.