سجن انفرادي

لململي أملي الباقي من ع الارض 

واستسمحك

قيفلي بيه هِدمِة عزيمة

براءة لو قطَّعت شُريان ودِنا بالعرض 

واذا هوبت ناحية إنطوائي

فدي الجريمة

من يوم ما ضرب اليأس الوحدة في دماغي 

وانا راسي تنزف كُل يوم عجز وهزيمة

مبقتش عارف خِلوتي نهاية المطاف

ولا البداية !

مبقتش عارف اكافئ القلب اللي ساقني للطريق

 ولَّا اعاقب عقلي إنه مجاش معايا

يارب

نوَّر عَتمِة الحيرة اللي فيا

وازرعلي في بور الشتات

حل لبُكايا

العُزلة

صوتها اعلى من صوت النجاة

خَوَتلي صيحها نافوخي دون جسمي

كسَرتلي باب الخلوة بالمعاناة 

ونهبت سعادتي

بدون ما تلمسني

يارب

ألهمني العصا علشان

غَرقي وشك على حافة الكتمان

واهلِكلي فرعون المخاوف "خصمي"

الناس بتاكل بعضها بره

الناس بتهرب لاجل قوت فاره

وانا لسة اهو والكبت منافسني

"ما لي إليك وسيلةٌ إلا الرجا"

ما املكش غيرها يارب رغم الحشرجة

وانت دليلي ومطمعي 

وحصني.