حُطِّي عيشِك جَنب مَلحي

حُطِّي عيشِك جَنب مَلحي

هاتي إِيدِك تِشفي جَرحي

يا الِ بيكي شُفت فَرحي

وِسط كون مَليان هُموم

مَرَّريني ما بين ضُلوعِك

قيدي فيا النور شُموعِك

كوني ليا واكون سُطوعِك

وِالسَّما تغَني لنا يوم

امشي بِيا فـ خط سيرِك

وابقى غُصن لقَلب طيرِك

اِوهِبي لي عنيكي غِنوة

ويبقى كتَّر ألف خيرِك

تِسوى إِيه الدنيا غيرِك

أَو هشوف ازاي طريقي

السِّكك مقفولة جدًا

افتحيها وبِلِّي ريقي

الزمن بقى طَعمُه ماسِخ

والسِّنين عَمَّال تُمُر

عَدَّى قطر البُعد خلَّى

قلبي بالأَحزان يُشُر

قربي لي وشوفي حالك

تلقي قلبي بنفسه جالك

تلقي قلبي فجأة نَوّر

بس نَوّر من جمالك

الشوارع تُوهه جداً

واما جيتي لاقيته سالك

لو للحظة تبقي جنبي

كل صعب يعدي سهل

قلبي عيل وانتي جنبه

واما تمشي يبقى كهل

مش هخَف طول م انتي جنبي 

ربِّك إن كلّف أعان 

إن بعد العُسر يُسراً

إن بعد الخُوف أمان