اسمه يوسف
ابيضاني و شعره كيرليح
جاي اسألكم عليه
مين يقولي
مين يجيبلي الواد و ياخد حزني مني
لما قصفوا البيت عليهم جت عليّا
وقّعوا الحيط اللي شايل قلبي فيّا
كسّروا الضلع اللي ساند بيه كتافي
قطّعوا الشرايين و سابوا الهم يطرح
كل ده و انا لسه بدعي و اقول يارب
يارب بس ألمح عيونه في اي مطرح
ييجي يجري عليا جري يقولي "بابا"
او يكون تعبان شوية
فَـ اروحله انا و اقوله "يويو"
ذنبه ايه الطفل طيب
إن يعني قلبه طيب
شاف قصاده الضربة جاية
قال اكيد دي لعبة يويو
فين حبيبي يا ناس و اروحله
فين ضنايا و فين فؤادي
لو صُباعه جراله حاجة
ما يشفينيش دم الاعادي
ما يكفنيش الكون بحاله
طمنوني يا ناس علي ابني
تحت انقاض التراب ازّي حاله
ايه اشد عليه في نومته
جوعه ولا البيت فوقيه !
لسه راضي يارب لسه
و عندي امل انك حاميه
كل حيط في البيت يا يوسف
خاف يسيبك
و اما ضرب الحزن طوبه
خاف يصيبك
كنت واقف صالب الدنيا بِـ ايديا
بس جاتلي من الصاروخ شاظية تقولي
مات حبيبك
ايه يا يوسف
هونت بس عليك تسيبني
او تموت من غير ما تاكل
عيشت تحلم تبقي حر في ارض حرة
مُت راجل يا حبيبي و ابن راجل
بس برضو غيابك انت
ساب في قلبي الحزن سارح
لجل ذلك او لذلك
لن اصالح ..