دَين
من يوم وجودي فبطن امي ...
وإيد أبويا نازلة ضرب
وكإنه شايف جوا منها... دَين جديد
هيزيد همومه
وعشان كدا ..
قرر يُقص الحبل بين بطني وجيوبه!
بس القدر ...
وف لفتة واضحة م الدناوة
صابلي عيني وسابني اعيش!
ف فضلت اشوف الناس بقلبي
وفضلت أقول ع الشر خير
يجي صاحبي ف الهزار ويقولي: ياعور !
ف يرُجْ عيني كلام كتير
مربوط جناحي بكل ذكري ف قلب اوضتي
والريش بينزف تحتي ويسجل هزيمة
ف بصير جبان ..
وألاقيني نوتة ..
عمّال ادوّن ف المحاولة بدم ريشي
والدنيا واخده مشاعري سحل على الكمان!
خليني انام!
مش كل مرة هخبي عيني م الشيكات...
واحسب فاتورة
مش كل مرة الحيطة هتبطل صراخ
هَاينز عقلي الفِكر
يفتحلي النافورة!
-باقي كام!
= لسه فاضل دين مماتش ... موت بداله
-بكرة تُفرج
= لأ لايمكن
الفقر بايت من ميلادك
شاف مخاوفك ..... جاب عياله!
حظ مين!
انا كنت اسب الحظ وألعن
قام طالعله كفوف وعين
وهراني ضرب
بكفاية حرب
خليني انام
كنت يابا تشد ايدك
وتهد اول سُكنة ليا فبطن امي
وتقول يابخت الأرض بيه
طب اديني هارب من كفوفك
بس كف الدنيا يابا مسيره ايه ؟
ما العمر مَر
وعملت صُحبة معادش فاضل فيها حد
وبقيت بحب ..
والحب وَلّد مني شاعر مُستبد
عمال ادبَّح فالقصايد/ جوا عقلي
قبل ما تكوّن جريمة قصاد عينيا!
خليني انهي علاقة مرة واكون طبيعي
مش كل مرة الحزن يتكاتر عليا!
وياخدني صيدة ..
ويسيب مشاعري كالجواري
تتراضى بالرقصة على بيت القصيدة!