الإثنين 15 أبريل 2024
المحرر العام
محمد الباز

اطلع بره

لوحة لسامح وسيلي
لوحة لسامح وسيلي

(أنا بدِيلك كارت الطرد) إطلع بـَره 

قلبى خلاص بينضف نَفسُه 

ومش هايعِيد من تانى الكَرّه.. 

مَـرّه / ومَـرّه 

مانا واحشانى مشاعرِى الحُره

مش مــ العَدل إن أفضل يَعنى فى مُهاترات الزِيف الحَاره.. 

إنت مفكر نفسَك مين!

دا أنا شدِيتَك هِنا بإشاره 

قُلت أحبَك بس لاقيتَك، جاى على رُوحى بأعلى خساره.. 

عيبَك إن فاكرنى بارَيّل!

نَاسِى إنَك حِتِةِ عَيّل 

أقدر أشُوطه بِعيد، وأستغنى، وأنسى آلامُه فى وقت قُليل..

إطلع بره بعيد عن عينى، أرض الله 

مليانَة وواسعة، 

ماتعشِمّش فى نَفسِك أرجع، ولا أحِن لصُلحَك وأسعَى.. 

أكبر لعنَه كانت قُربك 

وأكبر حُرمَة هى وجودك 

وأنا دلوقتى أكيد مبسوطة 

لما كَفرت بكُل فُروضك.. 

آخِر واحِد ممكن أفكر، إن أرجع لـه 

وأبكِى عليه،

مش معقولة بعد ماجِيت وعَملت الصَح

هارجَع فيه.. 

جِت لى الفُرصَة الوقتِ أديلك

كَارت الطَرد وأشُوف مَصلحتى..

جِت لى الفُرصة بإن أبيعك 

وأنزل أجيب بدموعك راحتى، 

أيوه غَباء/ بِغباء باكتِب لك 

بِعتَك زى ما قلبَك باعنى، 

تزعَل قد ماتِزعل عادى 

ما إنتَ كلامَك ياما وجعنى.