سفر وكلام
فى قلب واحد صعيدى
من وسط البنات اختارنى
كنت زرعة لسه خضرا وقلبى زاهى
جالى قالى
إنتى بس يا شاغلة بالى
كنتى لما تطلى ألاقى
شمس طالعة من حداكى
أنده السود عنيكى وأرتوى من نظرة ليكى
يا اللى حاجزة القلب بيكى
حنى واسألى مرة
تايه فى بحر ومركبى فضة
والمرسى بعدت
يا أم الجبين عالقلب
فضى من جماله
الشط بان
أنا الجبان فى الزحمة لجل ما يحسوكى
وانا السهران على بابك بقالى زمان
رموشك سوده كالليل
كشف القمر سترك
وشفتك كما لو كنتى ويايا
جميلة تشبهى فلسطين
يا ساكنة من القلوب قلبى
وصورتك فى العيون دمعى
صعيدى وحرقتى قدرى
وغيرتى صعب توصلك
ربيعك فى السنة سنين
جهرت باسمك الفاتن على شفايفى
سمعتينى وجايه اليوم تعاتبينى
عاتبينى وهامسينى وضمينى فى كلامك
ما يمكن أفوق
ولا قادر أشوف دونك من بنات حوا
أميرة وانا من العامة وكلى شوق
دى حتى عيوبك الظاهرة
بتسكرنى بكأس الحب على سهوه
خايفة من حبيب صانك فى أحلامه
وخاف يلمس خيال ليكى فتترجفى
قصاد عينه
تميلى عليه
يبان فى عنيه سفر وكلام
تحبيه
تحبينى
وهل فى يوم تحبينى
وتيجى لعندى بدلالك
أنا الشارد فى أفكارك
يا فارشة عالهوا حجابك
بلاش تتقلى علينا
كأنك طيبة بأقاليمها
ومعابدها
صغيرة فى جسم فرعونى
أدوب فى الحسن يا زينة
وأدوخ من نظرة رميتها
على دارنا
أخبيها من عيون الناس
بلادنا كبيرة
وفيها من البنات ألماس
لكنك حاجة مجهولة
لا قادرة تكونى جنية
ولا محسوسة كالناس
غريبة فى كل أحوالك
وأنا صبرى نسيته خلاص
وحيدة فى قلبى وضلوعى
بقيتى سطور لموضوعى
خدينى واكتبى اسمى
قصيده تحاكى أوجاعى.