الجمعة 19 أبريل 2024
المحرر العام
محمد الباز

عمرك معايا

لوحة الحب والألم
لوحة الحب والألم لإدوارد مونش

عمرك معايا

زى السيجارة إما بتعزم بيها على واحد

ويقولك متشكر فيكتب لها عمر جديد

فمتحلميش بوعود منى

ولا تحلمى إنى حغنى

أو حتى أعزف لك ألحان

مش ضعف منى ولا قوة 

القلب فيه أشياء جوه

مش سهل تطلع أو تتشال

ولا يوم حينفع إنى أكون

زى الأراجوز

الناس بتضحك على هبلُه 

وهو شايل حمل سنين

لا حد يعرف إيه هامه 

ولا حد شايف إيه بكاه

فمتأمليش إنى أسلّى

أو حتى لفراغك أملاه

وإن كنت زمان بصيت غلطه

على قلبك مرة فسامحينى 

لكن مش قصدى إنى أضرك

أو حتى يكون جواه سرك

أنا قلبى كبير لكن مليان

وأحطك فيه إزاى يعنى

وأفضى إزاى من قلبى مكان

وإزاى أستحمل هم جديد

حتى لو قولتى القصد كلام

ما أهو أصل الواحد مش ناقص

ولا عاوز شىء ملهوش لازمة 

وإن قلبك قلك بتحبى

يستاهل ياخد بالمركوب 

أصل الحب يا بنت الناس

لو بينا أكيد هيكون معيوب

حبك ليه زى القهوة

أول ما حتبرد حتموت

عارفه العين إما بتسرح فى خيال كداب

والقلب يصدق فتحسى

إنك تهتى فى بحر عنيه

عارفه البصه دى كانت ليه 

منك أنت أما أنا لأ

بصت عينى على قلبك كانت صدفة

ومش شايف فيها استغراب

نقفل بقا على المواضيع

القهوة اتدلقت من إيدى

اعملى غيرها يا أبوحبيبة

واملى الولاعة؛ لو أمكن 

أو حتى تجيب كبريت دلوقتى

خلينى أولع فى الصدفة، وأختصر الوقت.