علبة مجوهرات

مزيكا علبة المجوهرات بتفرض إيقاعها

والأوضة اللى بتفضى م المرايات المضحكة

هاتعريك دلوقتى

وتفرج الزوار على دموعك السريعة

مين اللى هايطبطب عليك

مين اللى بيعيط معاك

مين اللى لسه بيضحك

البنت اللى دايمًا بتغيب

والواد اللى بيحبها

فى كل تفاصيلها القديمة

وهوَّ بيتكلم عنها فى أماكن مشبوهة

مع ناس مش مهمة

- مع اختلاف وجهات النظر-

مزيكا علبة المجوهرات مجرد خلفية بسيطة

لاكتشاف الدنيا

وقصيدة النثر مش مناسبة لصيف ٩٧

ولا خنقة قميصك بتحسسك بالدهشة

الأوضه اللى بتتملى بدخان غريب

هاتغطيك من تانى وتطبطب عليك

وتعيط قبلك

على تفاهة مشاعرك

وكمية الدموع اللى بتأجلها

لأحزان مهمة

مزيكا علبة المجوهرات بتملا الأوضة بدموع كتير

رقصة البنت الحزينة بتراهن على عياطك

طب مين يقاوم بعدك

تفاصيل السؤال

والحدوتة القديمة

ومزيكا علبة المجوهرات

بتفك لك آخر زرار فى القميص.. 

وبتخنقك فعلًا.