تفرج

مكتوب... 

على اللى مالهوش نصيب فى الأرض

يشتغل... بياع نجوم

علشان كده ماشى 

أزق السما

فى عربيتى الخشب

وأسرح مع الأيام

فى تقاطع السوق القديم

والمخبز الآلى..

أملا الفضا قراطيس

من كراساتى القديمة

يمكن نجوم الصفحة 

تحضن نجوم العلالى.. 

وعشان الدنيا تحلى

وتليق بعرض الكون

بجهز كل كوم

ساند أخوه الكوم

واتحايل على الأكوام

يتوزعوا بالتساوى

لكنه

دايمًا بيفضل حلم مستعصى

على بياعين النجوم..

أمثالى

ومافيش باليد حيلة

غير أنى أسرح 

هنا وهناك كل يوم

وأنده.. بعلو الصوت

أقول لخلق الله

تسالى.