مزاد

«ماكانش لازم أسيبها تحرك الأيام

ماكانش لازم أسيبها تلعب بيها

وأناااااام».. 

بنتى

كسرت ساعتى وقعدت تلعب

وبصوابعها النونو 

رسمت جوا الدايرة دواير

جرت عقرب شايخ

جرت أيام وشهور وسنين

وصحيت.. 

عضمى مكسر.. حيلى مهدود

كلبى مفرود جمب سريرى

مش عارفة ولادى راحوا فين

بس يا بنتى كفاية جريان

كتبوا الإعلان

بعد وفاة كل السكان

هنبيع البيت

فتح المزاد

سجادة.. سرير وحصان خشبى

بطاطين.. ملايات

على كام خدادية محشية بأحلام خايبين

مش فاكرة ولادى كانوا تلاتة ولا اتنين؟

كان فيهم واحد ناوى يسافر لفلسطين

تليفون وعرايس مكسورة

ورود مبدورة

جزامة اكتظت بالدواوين

مش عارفة ولادى راحوا فين؟

خمسه ستارة ومافيش شباك

وقفص عصافير

ومراية كبيرة وكوم أقلام

شريطين قرآن.. 

تسجيل خسران

مقبرة

محبرة

ومدينة اتحاوطت بالأكفان

عصفور أزرق مخلوع العين.. 

كرسى هزاز

وجدار متشخبط بالألوان

راديو مابيزيعش

غير أعداد المجروحين

كلب حراسة مات

م الإرهاق مفتوح العين

بس يا بنتى سيبى الساعة

مش فاضل

إلا صورة باهتة على الحيطة

مش فاكرة لمين..؟