بنتولد دمعات
يا ابن الحياة والموت
هو أنت مش زينا
دمك شبه دمنا
طب ليه بتنكرنا
وأنت اللى على خيرنا
رعرع غناك بينا
أنت اللى من طينا
لو كنت تستنى
كنت أوهبك شوقى
وألف قلبك بالغنا
وأعلمه الزقزقة
أحلامنا متفرقة
بينا وبين الريح
وقلوبنا شجرة توت
لا بتحيا ولا بتموت
ولا فيه أمل فى اللقا
إيه اللى فاضل بقى
وإحنا الغنا والخوف
لون حزننا مألوف
لون فرحنا مختلف
أوقات كتير نئتلف
وكتير كتير بنتوه
وف نن عين الشمس
بنتولد دمعات
وحاجات بتمحى حاجات
ولكل ده أسباب
بس إحنا مين قوللى
قبل أما تنكرنى
آخر حدود ضلى
دمك على دمى
أنا كنت متسمى
بالحزن فى كتابك
افتح لى أبوابك
وخدنى بين السطور
يمكن يكون لى ميلاد
ونعاود الألفة
أنا وأنت والأحزان
يا بن الغنا والبوح
اركب سفينة نوح
وافرد قلوع قلبك
ولو الطوفان قابلك
دوس على اللى كان قبلك
وانسى اللى بينا وفوت
ارفض تدوق الموت
لكن ما تنكرنيش
وأنت ف أمان ع الشط
يمكن أكون لك طوق
لو زاد عليك الطوفان
وغرقت فى دموعك.