الإثنين 15 أبريل 2024
المحرر العام
محمد الباز

طريقتى المُثلى لكتابة الشعر

كتابة الشعر
كتابة الشعر

عايز تقول

غير المساخة اللى قالوها

بدون ماتنقل صورة أمسخ

اشخط فى سن القلم يرسخ

وإياك لتنسخ م الفراغ تفاصيله وتقلد

وإياك تولد فكرتك

قبل اما ييجى مخاضها.. غصب وقيصرى

وازن ما بين الشفاهى واللى لازمًا يتقرى

خليك ثرى فى المفردات

اجعل قاموسك ناموسك رتله

واطويلى وافرد حبل إبداعك وحاسب تفتله

الشعر عايز حد ينفخ روحه فيه

يحيه إذا ما الادعاء صمم ترصد يقتله

عايز يبان الشعر غير

خليه يطير بره السما

خلى السما بشوقها تناديه

ارجعلى أنا بيك مغرمة

خليه فى عز القحط سبع ألوان مش أخضر بس

جمع طقوسك فيه يفك المس أو خليه يمس

الشعر خارج عن قانون الرص

قشر وهاتلى الشعر فص لبرتقانة سكرى

يغرينى

ركبلى شعرك دوا يشفينى

كن عسكرى مرور الكلام جوه الصدور

كن دور أساسى ف نص أبلغ م اللى تحت إيديك

كن ديك بيرقص تانجو فوق السطح

هدهد بيلعب هوكى

وإياك لتسلك فى القصايد مسلكى

النهج نهجك فضع مناهجك واجتهد واسعى

للشعر ساعة البنا قصعى

املاها واحملها.. وإياك تحمِّلها

أزيد من الطاقة

للشعر خانة فى البطاقة وله فصيلة دم

موجب فصيلتك ع الورق دهشة

سالب فصيلتك ع الورق هامش

دمك مركب خليلى أحمدى

اسمك يجوز مايكونش أصلًا أبجدى

شعرك ونثرك بين إيديك

وانت بما يرضيك هتصبح باختلافك حر

حاول تمر من الحيطان

حاول ماتوصفش الغيطان بالزرع

حاول ماتحلبش الحليب م الضرع

حاول محاولات القمر يطلع فى عز الضهر

جرب تخلى المهر يزعل من حصان شطرنج

جرب تخلى البنج إكسير الخلود

ينفع تخلى الدود نباتى

ينفع تغنى سكاتى أوبرا

ينفع تخلى القاهرة الكبرى

أضيق من الدبلة

رتب مقابلة بحبيبتك تحت كوبرى الجنة

لما بدا يتسنى

ينفع ماتتغناش كده

إعرب سقوط المبتدأ

واحذف خبر كاذب وسمع

صحة الموضوع

واستثنى كل اللى ف حديثك

للأسف موضوع

نقح بيانك وعالجه من أذى التحريف

سمع ودان الريف ناياتك

عرفنى ذاتك

واعرف معايا الميزة إيه فى المعرفة

اعرف مزايا كتيرة واوجد ميزة أحدث

اعرف هوية حرفك الأقدس

اعرف تروض خيالك

اعرف مجالك تبقى فيه أفرس

أخرس

يساوى العلام كله

حريف كلام

لكن كلامه يسف ويقله

اعرف عشان نعرف

اعرف عشان تعرف

اعرف عشان

واعرف ولو من غير عشان

ثبت نيشان الكلمة واطلق فى المدى

خليك ندا

يمكن إذا التتيه غلب

صوتك يدله

خليك رفيقه ف غربته

وماشيه كما ضله

لازم ملازم فيما لا يلزم أوى

ثم ابتكرله لزوم

لازم كده والزم

شعرك يدوم.