الثلاثاء 28 مايو 2024
المحرر العام
محمد الباز
المحرر العام
محمد الباز

ولدى

ولدى
ولدى

ولدى ده جدك ياما وصانى

أهلَك ل تُهلك عليها ربانى

بقولهالك واوعى تقطع الأرحام

ووصى ابنك يوصلها لحفيد تانى.

ولدى إذا مات أبوك واندفن

ادفن معاه ورقة وقلم فى الكفن

وجهاز كاسيت وسمسمية مولفة

تيجى الملايكة أشكيها م الدود والعفن.

ولدى ما تبلعش لحبيبك زلط

وفهمه إزاى يجافى الغلط

وطيبة القلب اللى زايدة عن اللزوم

بيفسروها الناس بكلمة عبط.

ولدى ما تعشقش يوم القمر

ولا تسرق الجمال ولا راعى البقر

السرقة فعل قبيح كريه مزمزم

أما القمر ده صخور ودبش وحجر.

ولدى فى زمانى شربت مية قلل

وأكلت لقمة بملح واتحليت بصل

وكنت طول الليل أقول مواويل

معرفش ليه فى زمانكو صابنى الملل.

ولدى بقولك اوعى تعرف قلق

ولا يوم تشيل الهم لو تتزنق

ولا يوم تطاطى لحد مهما يكون

ما تخافشى من مخلوق وخاف م اللى خلق.

ولدى ما تلعبش بنار تحرقك

ولا تبقى لوح مسمار كبير يفلقك

خليك حريص ونام مفتح عنيك

لو يوم غفيت فيه ألف مين يسرقك.