اخرج بقى

حاسس إنه بيكرهنى

وبيحفر فى شوارع قلبى المرصوفة أمان

وبيقفل كل بيبان الطيبة فى نفسى.. وبيبنى حيطان

تحجب عن حلمى الضوء

وبيرمى بذور السوء 

فى غيطان إحساسى

وبيوهمنى

إن كيانى مش فى مقاسى

أصرخ فيه.. ابعد عنى

عايز أتحرر

ألقاه قرّب أكتر منى

ويقيّدنى

أمدّ إيديا لنفسى وأعافر

ألقى إيديا مش طيلانى

اصرخ تانى

وكل ما أصرخ.. ألقى إيديه

ماسكة لسانى

بتسكتنى.. وأنا محتار

وكل أما أسكت

ألقى سكاتى جورة نار

أفضل أقاسى منها وأدوق

لما بقيت فعلًا مخنوق

ونفسى.. أبلّ ريق روحى

اللى عطشانة للشهيق

وكل ماسْحب م الهوا.. شهقة

ألقى الخلايا مغيمة.. ومعتمة

والسكة اللى رايحة

لضحكتى.. بيسدّها فى وشى

فصّلت من جتتى يافطة

وأخدْت نقطة من دمى

وكتبت بالخط العريض: 

ياللى أنت ساكن فيّا

وحَياتى فيك متعلقة

اخرج بقى.