الجمعة 24 مايو 2024
المحرر العام
محمد الباز
المحرر العام
محمد الباز

جمال بخيت يختص «حرف» بقصيدة عن عمار الشريعى

عمار الشريعى
عمار الشريعى

يا قلب عمار الشريعى 

يا رحلة الضوء الجميل 

من أول النور ما ابتدى

لحد باب المستحيل 

دقدق معانا بريشة العُمر الطويل

بحر النغم بيقول يا نيل مش راضى منك بالقليل 

تعالى نسهر كلنا ونغنى غنوة حنينة

دايبه فى نور شمس الأصيل

يا قلب عمار الشريعى 

يا رحلة الضوء الجميل 

يا قلب مغرم بالوجود

ما بين مقام العشق ومقام الخلود

فى السهرة عمار مبتسم 

وفى حضنه عود 

مشى بالمحبة من البياتى للصبا

وراح على نهاوند يحضن بدرقة

العتمة خافت صوته يفضح سرها

اترستقت فى القعدة مقامات الحجاز

صحيت عصافير الهواء ونقرت فوق الجزاز

اه من جمال الاهتزاز لما الصبايا رفرفوا 

وشعللوا فينا الجواز واللاجواز

اللحن صب فى عمرنا حب الحياة

ووصل فى شجنه لمنتهاه

النكتة دخلت لملمت من الليل شقاه

وضحكنا لما الصبح تاه

ضحكنا لما القلب طب

وعلشان نعدى من المطب

اخترنا عمار الدليل 

وصل قلوبنا للحياة 

ودل الصبايا على السبيل.