الجمعة 24 مايو 2024
المحرر العام
محمد الباز
المحرر العام
محمد الباز

كريم الشاورى يكتب: خايف أروح مسرح

مسرح
مسرح

بقول لنفسى بلاش..

للمسرح صوت جذّاب

تحسى معاه بالصدق

تلقى الكلام كدّاب..

على قد ما يدّى 

بيسرق الأيام..

على قد ما يغنّى

بيوهم العشّاق

وبيسرق التفاصيل

وبيفتح بيبانه..

ويفرّق المناديل.. 

- مشهد تراجيدى بجد

سرق الدموع م العين

والبطل انتهى..

دوره ف دقيقتين

كانت حكايته إنّه

عاش الحياة بطولها

كورس على الجنبين

ولما جات فرصة

وبروزوا الصورة

هى يدوب ثانية

وتنتهى بطولة.. 

- مشهد كوميدى بجد

بيرزع الإفّية..

كل الحضور يضحك

إلا اللى قاله عليه

بينكّت الحزنان

ومين على المسرح

نزل ما بين الناس

وتاه ف وسطيهم

علّق المشنقة

مالقيش أمل فيهم

كل الإضاءة بِلاك

إلا اللى كان ف الحبل.