الثلاثاء 16 يوليه 2024
المحرر العام
محمد الباز
المحرر العام
محمد الباز

محمد شاكر يكتب: بينى وبينك عهد

بينى وبينك عهد
بينى وبينك عهد

وزعتى روحك ع الخلايق ورد

مستخسره فيا اللى باقى من ترابك ليه

ليه فارده نفسك للى بيغشك

وانا اللى عاشق طلتك راميانى من عشك

وبتنكرى وجودى

بصى على هدومى

لحمى بقى بالدين

ومليت عنيه م اللى فاض من ضحك أحبابك

حرمونى م التموين

بينى وبينك عهد.. بينك وبينهم عقد

انا اللى من دمك

ليه تسعدى بهمي.. وتشربيهم شهد

كنا عيال متشعبطين فى الفقر

فتحت عينى لقيتنى جواكى

كنتِ اختى ف طفولتى

كنت أمى ف شبابى

ليه بتقفلى بابك عن اللى غطاكى

ورواكى من دمه

ف لسانى ميت لهجه.. سخرتهم ليكى

إيه بس يرضكى.. يا بنت أبوى وأمى

علشان ما أعيشّ وحيد

ولعتلك قلبى.. قنديل ف عز الليل

وعملتهولك بيت ف النار وف الجنة

مين اللى كان جالنا لما القمر ضلم

غير اللى كان له دين

قدمتلك كفنى من يوم ماكنت جنين

ووهبتلك ابنى قربان ليوم الدين

وعرفت ميت صنعه علشان ما أبينلك

مين فينا أب لمين.. مين فينا ابن لمين

مين فينا حضن لمين.. مين فينا رافض مين

يا معجزة ربى

ردك عليا ليه أسى وانا ردى متربى

علشان كده ههديكى أحلامى اللى فضله للمدن

كل اللى فاضل م البيوت

كل اللى فاضل من قصايدى البكر

كل اللى ملكى من حروف

بهديها ليكى انتى.