صورتي في البطاقة
أنا مش بطولي
ولا عِشت الحياة بالناس
أنا مش مؤدب أوي
ولا عُمري كنت صاحب كاس
أنا مش چيڤارا
و عُمر السيجارة
ما عِرفت طريق جيبي
محبش التمثيل
و بظهر كده بعيبي
ف الفَصل
كان عندي عِزة نَفس
ف مجيتش مرة و كنت بشاورة
لا عِشت ساعة حرب
ولا اتولدت ف الثورة
كُل معاركي هتشوفها ف عنيا
كُل مخاوفي مهتشوفهاش
و البنت اللي حبيتها حبيتها
لكن مقولتلهاش
رقصت ع السلم بما يكفي
قعدت مع نفسي بما ينفي
كوني معرفهاش
الحب عندي حب الصحاب و الأهل
الكره عندي كره الفساد و الجهل
و العيشة متعكرة
زي الشيشة ف الكركرة
صاحبت راجل راجل
و صاحبت راجل مرا
و صاحبت ناس منظرة
و ناس لا تُشترى
و رجعت لنفسي ف الآخر
بَعشق أواخر فصل الشتا
علشان بيخلص بس
أنا مش بطولي
ولا شَخص مُبهر أوي
يكفيني لما هتشوفني
هتشوفني راجل سوي
و بتكلم عن أي شيء مأسوي ميعجبنيش
و عشان كده البنت اللي حبتها محبتنيش
قولتلها معيش مصباح هنفذ لما هتشاوري
أنا مش بطولي و برضو مش ثوري
بقول كل الكلام كما فيا
إيدي لا مكسورة ولا ملوية ولا راسي مبطوحة
أقواس التاريخ لسة مفتوحة
و أنا مش بطولي
ولا سوبر مان
أنا يدوب
قالب تُراب
قرر يكون
..إنسان