شنطِّة حُفَر

كان ياما كان
قبل الإنسان مايحول وجعُه ويبقى رامات
قبل امّا عينيه تُحضن تايهين على ضهر شاشات
قبل ما يبعت حُزنُه وقلبُه ريأكت وشات
قبل ما يبعت فِ الكاش سلامات وأموال
 سابنِّي وقال : 
مِسافر كام سنَّة وراجِع
سحب من روحُه آخر شهقتين دخان
و طفّى ف قلبي أحزانه 
ولَم سِنيَّنه فِي الشّنطة، وساب لامه هدوم، و هموم؛ تونسها
شفايفه رماها لاخته، وساب لها دموع يم بتدوسها
زرع فوق الحيطان دمعةْ 
حصدناها عينين في الشق بتعيَّط؛ إذا جات ذكرى تلمسها
مِسافر كام سنَّة وراجِع
أجيب الضحكة من توبها، وأفَصل من جِلودها هدوم
دموع الأُم بِتقاطعه: "وهوّ العُمر في كام يوم" 
وكان كتفه على بابه شايل ضحكة تملي اتخمست نفسين
وشال فِ إيديه "كفن غِيبتُه"، و فِ إيديه اللي باقية سنين 
ساعات الغُربة بِتأدَّن وبتقسّم ف شوق القلب ع المواعيَّد 
معاد هيشم فِيه رِيحة خطاوي نزفها كل طريق
معاد لصديَّق
و آخر ل...
جري قَلبُّه عليها عشان يقضَّي ما بقي م العُمر 
- مِسافر كام سنَّة وراجِع
فردِّت فُرقةْ، و بحُرقةْ: "يا خوفي و كام سنة ما تجيَّش"
ومدَّت له إيديَّها بحُضَّن  ** فمدَّ القَلب بالأحضَّان
           وأدَّن بعدهم بالحزن ** فصلّت له القلوب حِرمان 
و فات عمرين 
وصل بيتهم جواب منّه: رسالة بعمره في حوالة 
يدوب فتحوا الجواب؛ فتحوا... جراح كات رافضة تتخيّط
قروا سطَّرين  يا دوب، بعدين لقوا حبر الجواب عيَّط 
و فات كام شهر
وجات لُه الكَسرة فِ الجوابات 
فتح  أول جواب: كان أبوه... كاتب له قلبُّه فِ أول سطَّر 
وراسم عَجزه فيه بالحَرف
فشاف طَّرف البياض مكتوب "رصيد العُمر  بيصفّر
وحُزني فْ قلبي بِيعفّر، و روحي تطير مع الدُخّان" 
- "ياريتنِّي ما قفلت الباب"
نطقها و راح لتاني جواب
خلاص سفن الوصال مالت
حبيبتُه فِ الجواب قالت
ضلوعي للفلوس آلت
و ريحتك روحي رحِّتها؛ فروح... لجوابك التالت 
فشم المسك م الجَنة اللي مالها صراط
عياط في عياط
جواب أمه خده بالباط
أبوك فارقنا م الليلة فشمسه غياب، ما نلمحهاشِ يا عنيا 
فهم وقتيها... ما ف إيده ماكانش جواب
دا كان والده باعت له روحه فِ وصَّية 
أبوها الغُربَّة ملعونة بِتحقن في القلوب نسيان
تسرطن روحنا بالأشجان
و تاخد عمرنا سرقة
أعرفكم بنفسي الآن
أنا في الأصل طفاية ماليها التبغ و الفُرقة
و فيه جنبي على المكتب حوالة و كام جواب فيهم...
فلوس منها الأسى نابع
عشانها صاحبي طفّى القلب فيّ و قال:
" مِسافر كام سنة وراجِع "