ضرفتين شِباك
معروف يا حبيتي
الضل بيمشي
في ديل صاحبة
إشمعنا فـ أول ما امشيلك
يسبق ضلي
بشبه عيل متعلق
في حبال الغيبة
مُجرم في حبل المشنقة
وإنتي البراءة لو تطُلي
فهقول في وصفك
واليمين لله
كانت دليل حسي
علي وجود الإله
موناليزا مرسمهاش بشر
جميلة من كل إتجاه
لو تمشي فـ جناب الحياة
يتحل من باب الجمال ألغاز
عينها بتشبه حاجة في الثورة
لما الحكومة تضربك بالغاز
لما عينيها تحل في الذكرى
لإتنين بُكا على فكرة .. مبتكملش
أزهار إذا ماتت ..الريحة مبتدبلش
أشياء تبان في البعد لو نفهم
الهجر اكبر دنس ميطهروش زمزم
وأنا و انتي كنا روحين بنفس القلب
قبل الشيطان ما يوسوسك بالذنب
بقينا فجأه زي أوكر الباب
واحد ولكن كل نُص في جنب
وبقيت لوحدي زي فن جميل فـ جيلي
سطر شعر في إيد فلاتي على الرصيف
أو كتاب جغرفيا في رف اسرائيلي
كل الحاجات لو مش في أماكنها اتنست
وانا صورة عايشه في راديو
وإنتي صورة فـ كاسيت
بنموت عشان
سيبنا بعض بُعاد
خدنا السكك في عناد
ونسينا كل معاد
ورمينا كل دليل
الذكرى عقد ومن خرز وفتيل
والليل بطبعه من الألآت الحادة
يحلى لقاهم لما بسند ع المخدة
بيقابلوا بعض بحرارة حضن غايب
فينفجر قلبي لو تنفرط حبة
فيدب فينا البعد كام دبّة
ويجور علينا بنار تشوقّنا
كنا بنشبه ضرفتين شِباك
لما القدر قرر يشوف الدنيا
فَرقنا