الجواب

_مفتتح

أنا ليّا  عَنْدَك حُضن من آخر لُقا

وعنيا أضعف ما تكون علشان تِلمَحلَّك تَجِيها

وَحَشْتنِي والمَرّه دي عَتبة فُؤادي معلِّمه بخُطاك عليها

أنا لسه ببعتللَك جَواب واستنيٰ رَدَّك 

ايه اللي جاب نِجمَك سمايا واي اللي ودّي شهابي ارضك

_النص 

من بعد منه الكُون فْضيلي والنهار ضَلِّم عليّا

 الذِكْرَيٰ بتْعَجِل اوانها جاتلي م النْسمه اللي جايّه

 اهي جَات عينيا علي السَما

 والنجمه مش ظاهره النهارده والقمر مش بيلاغيني 

والمَطَر مَبكيش لإني طَرفت عيني 

واللي فيّا مَيتفهمش لأنه عَادي

والحَجَر دا ظلمته يامَا وهو اطيب من فُؤادي 

مخدتي دي معايا من عِشرين سَنه

 تمسح دموعي من سُكات

أول سَند لدماغي من بعد الرَحِم 

زِعلِت عشان شِربت عياطِي لحد ما نَفَسْها اتقَطَع وخيوط ف فِكْرِي تلِمها

زِعلِت عشان مَجرِتْش اشارِك فَرحتِي وانا حاطَه راسِي تضُمها

كَل المَسافه جرِيتها وَحدي مش هَقيس 

أنا حِيطتي خِيرها ف ودنَها سِمْعِت عِياطي ف عِزّ مَلْقتلِيش وَنِيس 

أنا لسّه رُوحِي بتلمحِك عَمالَّه تِبكي من سِنين

 اهو مين يا حِيطه هَيسْمَعِك 

شَبهت نفسي للقمر علشان فيه ضَلمَه مِننا 

بطلَع وابص علي السَما علشان نُونِس بَعضنا ...غايِب اكيد

اصرُخ ي بَحر يعلّي صُوته جوّا امواجه 

والله مش غَدار ي دُنيا

 احنا اللي جِينا دَخلْنا أَعماقُه

وطلِعنا نِلحِم جَرحنا ونحُط شَاش 

الليل دا مش هَادِي ف طِباعُه قلوبنا صَرخِت يامَا مسمعناش 

طالت ليالي من الوجع وهروح لفين اهرب لأي مَكان 

القَبر اوسع من ضُلوعَك وقت ما احتاجت الأمان

أنا كُنت آمِن إن حُضنَك بيت

 وانا جوّا مني ضفيره بفيونكَات وبنت

 اهي كات هَزيمه المره دي علشان 

كانت هَزيمه من مكان ما آمنت

 اياك تجازِف لسه متشعلَّق بدينَك  من رِموشي

 بتعمل اي علشان

 تِجري وتحضُن دَمعتين عِينك

 فانا لسه عاليه بنت حُزن التجرُبه بنت الرَصيف والغُلب والسِكَّه القصيره

بكتِب قَصيدتي علي الوَرق وبعيشها للِسكِّه الأخيره

انا جَايّه ليك حَافيَه الخَطَاوي عشان عيونَك غرقِتني 

والبحور كانت غَويطه وقلبي متعلِمش عُوم ونزلت فيها

إن كات أراضي الحُب ف الفَيوم فانا قَلبي ساقيه ولفّ حَوارِيها