مرسالين للخال
قاعد ومستني النهار يطلع
عشان يمضي لي تصريح المنام
تعبان...
وقلبي زي أتوبيس تسعيناتي
محملينه ضعف طاقته
خايف...
كعيل ثورجي
بيعدي وسط الأكمنة من غير بطاقتة
تايه في بحر الليل
ولا مرسى ولا مينا
وكاني نوح
ولكني مش لاقي السفينة
سهران...
ومستني النهار يمضي له تصريح المنام
عيل صغير قلبه خام
كافر بذاته
لكنه بيصلي القيام
كان نفسي ينزل م السما جبريل
يسعفني بالتأويل
لكني برجع أقول
لا انا عندي صاحب جدع
يرقد مكاني كإن انا في الدار
ولا فيه غنم يمحوا أثار قدمي
ولا عنكبوت
ولا فيه حمام ع الغار
قاعد ومستني النهار
وبمد إيدي للسما ماتمدش
وليلاتي ببعت مرسالين للخال ومايردش
صوت من بعيد..
"دنيا في هيئة خنفسة.. دنيا فسا"
الصوت بيعلى..
"المسألة مش قوافي قد ما هي رؤى
الكون في عين البصير
أصغر من البندقة"
الصوت بيعلى..
والقلم يتهز فـ إيديا
مشهد مهيب...
طار الحمام من قلبه لعينيّا
وكإنه فاتح صدره غيّة
ورمى القميض ع الليل فزال العمى
وكإنخ نجمة م السما جاية
مشهد مهيب
حتى الكتب واقفة بتديله التحيّة
كيفكم يا ولد وكيف لياليكم؟
الشعر عامل إيه على إيديكم؟
لسه بتعزف م الآهات موال ؟
لسه بتكتب والدموع شلال ؟
= تعبان یا خال
- توبك أصيل مامشيش على تو- بها
مكتوبك انك يا ولد ماتكونش مكتوبها
= أوصفلي مطرح بس ليها يا خال
يمكن ألاقي قلبي في جيوبها
ف الوقت دا...
نداهة تنده من بعيد
يا معشر الغاوين
يا معشر الهايمين
اللي كتب كل اللي كان حاسه
مكتوب عليه قصه
بس اللي بين اللي اتكتب واللي اترمى واتقص
زي اللي بين خاتم وبين قصّه
أشلاء قصيدتي هتفترق أشلاء
أشلاء مكانها هييجوا يترصوا
قولي يا خال طب إيه اللي ممكن يعمله
شاعر إذا حضر إحتضار نصّه؟
يبكي عليه؟
ولا بايديه يوئده؟
شاعر وكرباج القصيدة
كل يوم يجلده
شاعر وقلبه للوجع بيحن
عيل صحيح.. لكنه عيل جنّ
ماشي في حياته يكسر الموازين
يثبت بإن الشعر مش بالسن
قولي يا خال...
فهمني إيه الشعر؟
هو البصر ولا البصيرة؟
هو الغايات ولا الوسيلة؟
ولا حيلة اللي ما يملكش حيلة؟
قالي ف مكان ما زمان
وف جوكان واعر
على كل أرجاء البسيطة مطرت أحزان
وفجأة..
كل نقطة نبتت شاعر
قالها وساب لي حتة من قلبه وغاب
ومشيت وراه
من باب لألفين باب
اصبر يا خال
دا انا قلبي عيّل.. ليه تسيبه ينهشه الشوق والغياب؟!
تلاتين سنة في دنيا الديابة
ولسه من غير ناب
تلاتين سنة تايه فى وسط الليل
مالقتش غير صوتك
ونيس ودليل
فضحك وقالي: لسه غيرك ناس كتير
مستنيين الردع المراسيل
فيه لسه غيرك الف شاعر قلبهم عيّل
فعرفت يومها إنه لسه الخال مامتش
ومطفي قنديل القصيدة يادوب
وبيقيل