المشهد الأخير
اما اموت قولوا عادي إنه راح
كان جميل الروح وطيب
كان مابيساعهوش براح
قولوا يعني و ايه الجديد
عاشها ميت أو وحيد
ايد تتطبطب لأ مفيش
إيد بتجبر ما تلاقيش عمر ماتطبطبله إيد
لما اموت اتجمعوا عند المقابر
وازرعوا بصبري وغلبي في الحياة صبار يصبر
قلب أمي ويواسيها
قولوا لأُمي ابنك خلاص رايح لجده
وحده لكن عمر ما الأحزان تهده
احزني بالظبط ثانية وللا أقولك ثانيتين
حابة ليا الخير يا أمي امسحي دمعك وسمي وادعي ليا دعوتين
واما تجري ذكرياتي قصاد عيونك عدي ليها وعدليها واطرديها من دماغك واحفظي بس الجميل
ميلي بقرآن عليا ونسيلي الوحشة ديا
والصحاب الجد جاية لأجل ما ترد الجِميل
قولوا للمحبوبة عني فرقتك كات غصب عني
قولوا للصبار يغني غنوة ليها طالعة مني
بتناديلها وتغازلها وتصالحها وتناولها
ذكرى كان قلبي شايلها
لاجل ما تحررها منيقولوا لاختي إني اسف
ع الكلام اللي ف شفايفي مقولتهوش
ع الغشم بالخوف عليها وع الخدوش
أما أبويا كتر خيره كان مغرقني الصراحة
قلبه أبيض صوته طيب وشه كان مليان سماحة
أيده دي عكاز لأمي سندته دايما متاحة
جاني يومي قبل يومهم حلمي ولقيتله المساحة
قفلوا دنيا يللا وانجوزني ورايا طالة
عالجنان الخضر والله ما احلى دي والله قفلة.