خيال

مين اللي ليه الحق ومين عليه 

اختارنا امتى نكون طابور للسن

والوقت يلعب بيه 

غمض وفتح.... غمض وفتح 

أو بلاش اخزق عينيك 

أو قول يارب اجعل عينيا فوق دماغي 

علشان ما شوفش السوء في نفسي 

وييجي وقت اتباهى بيه..

ايه اللي لينا في الحياة علشان نقرر 

مين فينا اختار ان مثلاً كلنا ننزل عرايا

كان حد عاقل يختار ساعتها يتكسي بدمه 

علشان يداري العورة في ضميره من عين المرايا..

مين اللي صابه العجز فاخترع لينا السلام

من امتي كان الدم بحاجة غير الدم 

من امتي كان الشيطان يلبس بياض الإمام 

ويقول بكل سذاجة الإنسان 

حي على السلام حي على السلام 

حتي لو موجود سلام مفصلاه الناس على كيفها

لف في طابور واوعى تخون الصف 

امشي واضرب كف واقطع كف 

واذا خدت كف وطي وقول التاني فين 

اخلع ضميرك لو هيمشي وليه عينين

اخلع عينيك وحط قالب طوب مكانها 

علشان طبيعي الدنيا تبقى 

فيها ألف حاجة ترجعك انسان اكيد 

لو بس كنت في يوم شايفها ..

زي الدموع وقت الوداع ممكن تكون

 نقطة ندى صعبان عليها تبل ريق ورقة 

أو صورة للإنسان وقت ما بيجري عشان

 ياخد الأحلام دي سرقة

ممكن تكون حيلة في ايد واحد جبان 

اختار يخش الحب بالرّقة

والحب حرب سلاحها فيك لو يوم رميته

 هتلاقي منه موت المشاعر بس مالحُرقة ..

زي الحياة لما تسيب احلام تمدد رجلها 

من عقل انسان نفسه يلقى الإنسانية بجد 

فتغفله وتسيب نصيبه ييجي يبترها ..

زي الخيال لو شاف خيال بيقول دا فخ

فبيمشي جنب الحيطة يقطرها ..