خيَّاط .. ماخدِش مِن الحياة غير خيط وإبرَة

فِـ وقت مَـ كات هدوم الناس

جلود من كُل كائن حَيّ

كان عَم صبحِي فِـ بيتُه بيخطط عشان يعمِل قُماش

يترَجّ عقل الخلق منه ويضطرب تون الحياة

كان جيبُه عنوان الإبَر / والدهشَة والصنعَة العجيبَة

إن كَرّ مِنُّه الخيط .. يجيلُه الخيط .. بدون مَـ يقول لقطتُه

وفِـ إيدُه ماكَنَة مسافرَة مِـ المُستقبَل المجهول .. لأوضتُه

يسقيها بَكَر الخيط / وينفُخ روحُه فيها تجيب قماش

كان كيفِي أراقِب عَم صُبحي وكُل حتة فِـ جسمُه تتحوِّل لِـ نشوَة

ساعِة / مَـ يلمِس إيدُه طَرف الخيط

يبَسمِل ينتِشِي يصرُخ يثور

تتلضِم كُل الإبَر والخيط فِـ طوعُه

يبقا رَبّ وعدِّتُه المخاليق بتوعُه

وأبقا أوِّل حَد سرَّب للبَشَر خيّاط نَبِي

مبعوث / عشان يهدينا للهِدمَة النّضيفَة

كانت / براءِة الإختراع تشهَدلُه بالتخليد .. وبالسِّيرَة الخفيفَة

نفَّض خشونة الخيش عن النّاس أجمَعين

والنّاس أمَم .. واقفين على باب الحياة / مترصَّصين

مَـ فتحلُهُم غير عَم صُبحِي .. وبدأت النَّاس تتكِسِي مِنُّه ببلاش

وأنا بندِهِش ..

مَع كُل مرّة بشوفُه يعمِل مُعجِزَة فِـ حتِّة قُماش

قاعد / على بيانو مِن اللي ملوهش صوت

لكِن بيعزِف

كُل أما يلعَب .. ألقَى لون مِن بين إيديه ينزِف

يملَى كُل الدنيا مِن روحُه النَّبيَّة

كان كل شيئ بيعاشرُه .. ياخُد مِنُّه حِتَّة

حتى القماش .. يتمنّى يلمِس إيدُه يتحوِّل چاكِتَّة

عاش عَم صُبحِي فِـ أوضتُه مبيطلَعش مِنها

لا النّاس بتخلَص .. ولا القماش بيجِف نَبعُه

عاش عَم صُبحِي وبَكَرِةِ الخيط جوّا طَبعُه

واللي طَبعُه الخيط / نهايتُه بتبقى مرهونَة بـ مقَص

وزَّع حياتُه وروحُه / ياه على خِفِّة الرُّوح وَقت شُغلُه

وإيديه / يا باي على تُقل إيدُه أمّا العَجَز خلاهَا تِرعِش

وقِّفِت إنتاج مصانعُه وصدَّى تِرس مُهِم مِن عَجَل الزَّمَن

ولقيتُه أحزَن مِن كمانجاتِي اتحَرَم مِن جوز إيديه

سانِد على الترابيزة بعد مَـ صحِّتُه .. سَنَدِت عليه

كانتِ / دموعُه ساعتها أهوَن حاجة ممكِن ترتِطِم بالأرض

ومِش زعلان عليها

ويتخانِق / بواقِي القُطن .. فتافيت القُماش .. وباقِي العِدَّة

على مين يرتويها !!

وفِـ ظَرف غمضِة عين . . . وِقِع عَـ الأرض

كُل الحاجات فِـ الأوضَة لونهَا إصفَرّ مِـ الخَضَّة !!

مستنِّيينوا يقوم . . . مقامش مات عَم صُبحِي كإنُّه كان ومكانش

كُل القُماش إتلوِّن اسوِد بعدَهَا وإتيتِّمِت كُل الإبَر بعديه

مات عَم صُبحِي .. قبل مَـ يفصَّل كَفَن يتدَارَى فيه

ومسابش شيئ يشفعلُه غير .. طول الطَّريق 

ومخادش شيئ مِـ الدنيا غير .. مَـ أخَدش شيئ

غير رَمْيتُه .. عايش وميِّت جوّا نَفس البيت

صعبَان عليّا يـ عَم صُبحِي .. صعبَان عليّا

وكُل وِرثَك مِـ الحياة ..

إبرَة .. وبَكَرِة خي