إبراهيم عبدالفتاح يكتب: ببساطة
ببساطة
زى ماتنطفى شمعة
تقدر تحدد للوجع تاريخ نهاية
تقفل عليه صندوق
وتقفله برابطة هدية
وتركنه
زى مابتركن قميص ضاق عليك
أو مبقاش مناسب لقلبك
ببساطة
زى مابتنفض غبار عن كرسى فى القهوة
تقدر تبتسم وتسيبه لغيرك
الكراسى مابتحتفظش بذكريات
سميها زى ماتحب
تجربة
نزوة
قصيدة فاشلة
حلم ماستواش فى وقته
أو سراب علمك الهروب
بتسلم عليه مضطر
زى ماتسلم على صورتك القديمة قدام مراية مغبرة
خذ بإيده لضل مايلمحكش فيه
ولو التفتلك
قول له: «كنت بادور على نفسى فيك»
وابقى سيبه
زى ماتسيب سيجارة فى نصها
أو قطر ناسى رحلته
وماتبصش وراك
ببساطة
تقدر تبتدى من جديد
بشاى سخن
أو قهوة سادة بن غامق
أو مكالمة صغيرة لحبيبة قديمة
أو ابتسامة فى وش حد ماتعرفوش
أو بزهرة نبتت فجأة فى طريقك
مش شاغلك مين اللى زرعها.
