محمد الخضرى يكتب: يلّا نقيس

يلَّا نقيس، 

والله بتشِب 

طب نزِّل كِتفك ورِّينى،

والله أنا كبرت 

طب هات إيدك جنب إيديا.. 

ونشوف أنهو الأكبر تانى 

والله بتخُم

أنا برضُه اللى بخُم يا واد 

طب شيلنى على كتافك تانى.. 

ورِّينى الدنيا من فوق 

تبقى صغرت 

لسه ف نظرى حتةْ عيل مهما كبرت عايز تانى مهما كبرت

عندَك أب؟

سلفهولى لو ليومين 

محتاج حضنُه لو ساعتين 

طب أقوله يا ابويا ويمشى قوام 

وهخبِّى إيديا عشان ما يقولشى علىَّ كبرت

وهقرفص رِجلى عشان مايبنشى علىَّ الطول

وهبان قُدامُه حِتةْ عيل،

ويتبِّت بإديِه على كتفى

أو حتى يملِّس على شعرى، 

طب أقوله ف وِدنُه التوت واجرى، 

يلهفنى بكف يأدبنى 

أو حتى بصوته يهزأنى قُدام الناس، 

هتسلفنى؟

طب ممكن أبوك يسأل أبويا ممكن يرجع؟

أصل أنا مكسوف منه شوية 

من ساعةْ الحضن أمَّا اتعورت 

وانا كل شوية أقوله احضن 

طب ينفع أروح له وأقوله احضن؟

ينفع؟

ما أنا آخر مرة تعبت هناك، 

وأكيد منظرى زاد من وجعه

يمكن يسمعنى هنا معاكم 

واصعب على قلبه ويرجعلى.