شارع المش هارون

الشارع ضَلمة.. 

مش شايف فيه منفذ لـِ حياة.. 

ولا سامع صوت.. 

على أول دَرب.. اتنين واقفين.. 

والليل بيمشِّي الناس ويطفّي النور.. 

وبيحلَى الشُّرب..

فَـ بمُر..

وبلاقي هدوم بتنقّط مية بِـ طَعم المُر على المناشير..

وكأن الصبح بيمسك للفُقرا المناشير..

والناس بتقول دا قَدر مقسوم.. 

وبتفضح كِدب الفُقرا هدوم.. 

وبمُر..

وبلاقي الناس السهرانه بعيون دبلانه على الشبابيك.. 

شايفين الناس دِخّان.. 

نافخين دخّانهم ناس.. 

وساعتها بيفرض سيطرتُه الإحساس..

ويداري الكون بـ كفوفه الهَم.. 

وبتنزف سجايرهم دَم.. والوقت يفوت.. 

وبمُر.. 

وبلاقي أدان..

بتوقّع إني هلاقي ميدان مليان بالناس فِ صلاة الفَجر..

وعشان الفرض بقا فضيلة..

الدنيا سكوت..

وكإن شيطان شغّال إقناع فِ الناس إن الموجود فِـ الجامع مش ثاوبات.. 

لأ ملَك الموت..

وبمُر..

بستغرب جدًّا يعني واقول.. 

 الشارع لسه مضلّم ليه مع إن السما بتنوّر فوق..!؟

يتفلسف جنبي عَجوز ع الأرض..

_ الشارع ضلمة ياوِلدِي علشان الليل طالع فِـ وشوش الناس_

الله يكفيك شر الهم ياوِلدي.. 

الله يكفيك..

ويقولّي جنية تَمن الحكمة الله يراضيك.. 

بعديها بمُر.. 

والصبح بيبدأ يظهر تاني يصحّي الناس..

والناس بتخاف تصحى

وكإِن النور اللي بيطلع..وسواس خنّاس.. 

والفرن هناك يبدأ يفتح وينادي الخَلق..

مهما الأسعار هتزيد فـ خلاص.. 

سلّمنا الأمر إلى الرحمن.. 

وهيفضل فِ العيش الإخلاص..

وبمُر..

وياحول الله ع اللي انا شوفته..

وياحول الله..

يا طريق فـ النفس

و فِـ الدولة..

وطريق واسع والكون جّواه.. 

رغم اني الواد المتسمّي "وصَفَنجي الجيل" .. 

مش عارف أرسم جوة النَص.. 

البير وغطاه.