رقص الحروف

كنت اما بكتب ليها، ألقى الحروف ترقص
والخط صار احلى وكأنه مش خطي
كنت اما اعوز القرب، امشي عشانها بلاد
وهي يوم ما  تعوز .. بتدق باب قلبي 
من غير ما  بتخطي
والبرد برَّاها يلسع قلوب الخلق
وانا قلبي بهواها .. دفيان ومتغطي
كانت جميلة بدرجة
لو جات عليها الريح، تقنع هواها يوطي
كان حبك ينتشي منه القلب
نشوى الدرويش مع طول القعدة في حلقة ذكر
والضحكة ترقّص قلبي المسكين
رقص ام عريس في فرح منصوب لولدها البكر
كنت اشرد والناس قدامي بتتحدت
وانتي برغم المسافات الواعرة..بتشاغلي الفكر
كيف بعد ما كان القلب مرطرط بين الناس
دلوقتي شحيح من وسطيهم وبقالك حكر
كان الغضب فيا، يخجل قصاد عينها
ويخاف ميستسلمش
وكفوفي مهما تكون مهزوزة م السقعة
تحضن ايديها بشوق
بعد اما اكون كررت تحذيري ماتسلمش!!
انا كنت اطبق سهر
عشان كلمتين حلوين، يتقالو ليها الصبح
فتغلبني بعنيها.. واسكت ومتكلمش
نظم الكلام مطلوب، لحوار هتغلِب فيه
لكني كنت اجهل
قوة كلام بعيون .. مدعوم بنظم الرمش
وكلامهم العادي..لو قالته يصبح فتن
وان جينا للأحكام..
الفتنة دي بتساوي القتل وزيادة
والقلب لما اتفتن واظب على الزيارات 
وسماعه يوميا لكلامها مستمتع
والوصل صار عادة
ضحكتها كانت لون وملامح الدنيا
وان غابت الضحكة تلقى الحاجات سادة
والقلب كان مخلص..زاهد في باقي الناس
عشمان نوال الحسن..طمعان يزول الحزن
عاكف على بابها وكأنها عبادة..
انا مش بتاع أشعار ولا بظبط الكلمات
انا بس قلبي اشتاق..فبعتلك السلامات
وحب بس يقول..كل اما يكتبلك..
الشوق يكون فاض بيه، ولا عمره كان ناقص
والحرف م اللهفة .. تلاقيه يبان راقص
والخط يحلى كتير وكأنه مش خطي
وانا لسة بقطع سفر في القرب من قلبك
والاقيكي توصلي قلبي.. 
... من غير ما بتخطي.