تشخيص حالة مغترب

بطلت أشوف ...

 من كتر الدمع م غرق عدسات النضارة

وقت الحزن ... 

مش وقت تمدن و حضارة 

دمَّع .. 

خلي الشعر ينقط تحت رموشك بيت 

خلي الحزن يقول 

 قبل ما تمشي أكيد حنيت 

خلي اللهفة تبان و تقول حبيت

و فـ قلبه مكان هيساع 

لو كل العالم قرر ينفي 

و رموشه هتنزف كوم أنهار 

لو دمع العين قرر يستكفي 

كل المطارات زهقت أصلًا 

من كَمْ شعورنا المتبهدل

فوق أراضيها

و أراضي الغربة هتدي فلوس 

بس قلوبنا .. مين هيدفيها 

منشار البُعد ...

كان واقف بيسن سنانه ..

على أول خطوة فـ جسم الطيارة

و إن كنت قدرت أبان ناشف

 مش فارق رجلي لفين هتروح 

أنا كان برايا ساعتها الروح 

من أول م لبست البدلة 

و أنا سايب روحي فـ دورج الكوميدينو

كان عندي فضول أسمع أهلي 

و هما بيدعوا الله يعينُه 

حاولت أخودها إن شا الله فـ جيب الشنطة 

رفضت و قالتلي 

الغربة إن كانت حلوة لكل الناس 

فأنا عندي أونطة 

إفرح يا سحاب

 الشمس هتنقل لك دمعي و هيزيد وزنك

بالله دمَّعهم فوق بيتي يوم ما تدمع

أنا خايف سطح البيت يشتاق و يدمع برده 

ما أنا أصلي مسبتش شبر فـ أرضه 

من غير ما ألعب جواه " سيجا "

سَلم ع الكنكة و ع التحويجة 

أنا هشرب بن و أحلي المَية بذكرانا

عواميد النور أتمنى تكون بالليل فاكرانا

أنا سايب روحي ما بين نورها 

السكة طويلة 

 من باب صالة الاستقبال 

و لحد ما نطلع للمجهول 

خطيت و أنا حاسس ..

 إن صراط الغربة 

زي الموس

بيقَّطع لحمي و يكتب على راسي 

" مات شهيدًا في طريقه 

قبل أما يشوف م الغربة فلوس "