سيبلي عقدة
أنا.. وأعوذ بالله من "أنا" لمار
تسهر معايا الليل تكلمني
تقطف عناقيد الأمل مني
تقطع جذور الحلم جوايا
الإيد قصيرة ف حربي ويايا
وطبيعي لما هخوضها بخسارة
عيل كِبر، أخد الحياة على بوق واحد
علشان..
مايستطعمش إحساس المرارة
أخدتنا غدر الدنيا..عدت جري
وكبرنا فجأة ف ظرف رمشة ليل
تضليل يا إحساس النجاة،تضليل
الليل.. بيقطم كل يوم م العمر
قطمة
ويسيبنا واقعين ع الحياة
فتافيت تجارِب
وانا بعد كل هزيمة بترجىٰ الزمن
ف يقول بغمزة: تعيش وتتحارب
بتزقني الأيام على المجهول
خارج نطاق العادي والمعقول
سرسوب أمل
بيعدي من شيش الحياة
تضليل يا إحساس النجاة
والشيش قفل..على طرف إيد المعجزة
قتل القتيل.. واهو مد إيده ف العزا ..
سلسل شعاع النور بزيف الخير
ومنين ينبّت خير ف أرض ظلام؟
إنسان فرد جناحاته قصوها
بصوله خاف: بلع الكلام
وأعوذ بالله من "أنا" علشان
لسة اللسان خايف يقول غيرها
او يرمي كلمة حق ع اللي بيبخسه
ف بيستعيذ من نفسه وان قال الكلام
اول ما ينطق يعكسه
قطّعلي عمري وكيّسه
وارحمني من نفسي اللي مابتقتلش غيري
زي اما حطيت عقدتك ف تروس حياتي
روح سيبلي عقدة ف تِرس تفكيري.