عُمر من غير اللي عاشُه

"مُشتاقلَك .. فَتاويني في حضنك م الأيَّام

واحكيلي حكاوي كتير عنك .. هسمعها وأغمَّض يمكن أنام

احكيلي عشان وحشِتني حياتي بجد زمان

وانت وحشتني جدًا لكن يؤسفني إن انت ماتعرفنيش

مع إني فيَّا شبه منك .. اعتبِر الوقت ماغيَّرنيش

دول همَّ يادوبك حبِّة عمر  .. حبِّة خرابيش

كام نَدبة في روحي لازم منهم علشان أقدر أكمِّل وأعيش

على حبِّة هدّ من الدنيا وجراح فيَّا

كان نفسي لسه في طقم العيد وادوني طقم المَسئوليَّة

من يومها .. كل البراءة الساكنه فيك اتبخرت

أحلامك اللي انت راسمها .. أنا جيت وهي اتأخرِت

شوف حاجه غيرها أو أقولك .. ماتحلمشِ

الحلم شيء هيفهِّموك إنه وقودك ..

لكنُّه فجأه هيسرقك منك ويمشي 

فبلاش تغامر بجناحاتك بره جدران الحدود .. هيقصُّوهالك!

الدنيا أرخم من خيالك فاسمعني ..

لما تقولك بحبَّك ، اوعى تسأل يعني ايه

الحب نار أرجوك بلاش ترميني فيه

واكبَح جِماحها لو غارت بيك المشاعر

آخر غارتها بيبقى قبر وطريقُه واعِر

مليان بِشوك من صُلب لذَّة

وانت الحَداوي في رِجل خيلك لسَّه نَيَّه .. مش حِمل نَغزَه

روح لِجدّو .. العَب معاه أكتر كتير

خد من ايدين تيتَه العصير وبوسها واحضنها اوي

قبل ما الأيام تخونك وبفراقهم تتكوي

وإذا كان ممكن .. خلِّيني أنام لِيلَه في مكانك

ليلَه بس في حضن بابا وماما بترجَّاك .. ساعِدني

خُدني معاك المدرسة ..

في اتنين صحابك وحشوني اوي ومش لاقيهم من مكاني

قطَّعِتنا الدنيا واتغرَّبنا ياما ومش عارفين نتلم تاني

أما أنا .. فَمعادش ليَّا الحق أعيط

بتجرَح لازم أخيَّط والجرح خَد من جِسمي دار

لا ماتقولش أنا عايز أكبر مَفرمه حياة الكُبار

زادت همومي .. ومعادش عندي وقت أروق

أنا لسه طفل عايز يعيط صدَّقني مابينناش فروق

أنا لسَّه بعيَّط لو ماتت قطة .. مع إني لسَّه بخاف منهم

أنا عايز أشخبط ع الحيطة وأرسٍم اخواتي وألوِّنهم 

أنا عارفك جدًا صدقني .. فيه سِر قديم ساكِن قلبك

أنا لسَّه صاينُه لدلوقتي ومفيش مخلوق يعرفه غيرنا

في كلام جوَّانا وماخرجشِ رغمًا عن كترة دفاتِرنا

أنا لسَّه انت وماكبِرتش ، والدنيا مُصِرَّه تكبَّرني

أنا ألطف من إن القسوة في العمر بحالُه تغيَّرني

أنا عارفك جدًا صدَّقني وللأسف إن انت ماتعرفنيش

أرجوك استني ماتكبرشِ .. أنا أضعف فعلاً من إني أعيش".