الثلاثاء 16 يوليه 2024
المحرر العام
محمد الباز
المحرر العام
محمد الباز

مينا ثابت عبدالملك يكتب: دماغ أفلام

دماغ أفلام
دماغ أفلام

خمسة شاى وستة قهوة..

ومعرفش كام علبة سجاير

والعمر داير أحمى م المناجل

والحزن فاجر ومالوش بدايل

وانا قلبى شايل كام دُعامة وجَرح حُب..

رحت لـ صاحب نُص قديم وقت التعَب

قال لى مش فاضى..

أوقات كتير الغُرب تكسب لو الماتش اتلعَب..

فاكر زمان..

كانوا الصحاب متجمّعين بياكلوا شِعر

ويتدفوا صُحبة..

شاف الزمن لمّتهم اتجنن

بَعزقهُم ع البحر والغربة وساقية الظروف..

رُحت من باب المجازفة للمزاج ولّا

لِعب الغباء دوره بذكاء..؟

الأسئلة الـ غير منطقية.. منطقية..!! 

هو ريحته قَش رز..؟

معاه تحس الحظ رفيق..

ف ايديه بتلاقى البوصلة تِتُوه..

سبب طبيعى للشعور بعدم الشعور..؟

بتقول أى حاجة تِسَبِّب سُخرية..

والضحك الخوف

الخوف م الضحك..

إحساس غريب لكن مُريب

والواد الجِن بيلِف العالم ف سيجارة.. إزاى تِطمّن يا غريب..؟؟

تضحك تبكى

تكتب ف عقلك الكلام.. تسأل عليه..؟

إزاى الخوف من جلطة 

بيخلى الجلطة تجيلك..؟

وتخاف وتكون مِتزاوِل

تتحوّل فجأة من ضربة مرمى لـ فاوِل..

ده الخوف م الخوف بيخوِّف..

بيخليك تشعر بالفَخر..؟

بيسبب برضه.. الـشـ...ر..؟

وف نفس الوقت تخاف

وتشك ف كل الناس

والخوف الخوف شفّاف

والخوف الخوف الخوف

والضحك الضحك بييجى

وكمان الضحك يروح

تتسحب روحك منك..

وبتبقى الفقرة تضحّك

أسئلة ملعونة خبيثة..

بتشرب م اللبّيسة.. ومنين يطلع دُخَان..؟

تطمّن بس لمين..؟

ماهى دى أسئلة بالمنطق

والحزن قريب م العين

ملعونة الدنيا بحالها

والخوف بيروح وبيجى

وبيحصل ديجافو..

إنت فاهم إنك فاهم..؟

بيقولوا هاتنسى الموقف

«تطلق جيوش النّمل على عقلك

تفقد ف لحظة الشعور بالزمن والوقت والحقيقة»

ومنين العين بتهيّس

وبتنسى ساعات الحق

أو أنسى أتأكد برضه ساعتها

على فين بيودى لفين..؟

هو إحنا شربنا سيجارة

ولا إحنا صحيح مساكين..؟