فتحية محمد تكتب: أول ليلة ف القبر

أول ليلة ف القبر مكنتش لوحدى

بروزت أيامى الباردة

وحضن التلج اللى حاول يواسينى

ويركب مسامير 

يتعلق فيها عيال الحارة

وأنا وسطيهم

أول ليلة ف القبر

أبويا مستنى.. أهرب منى وأروحله

أفتنله على أمى

وازاى كانت بتضحك ف غيابه

فهمته أنه ضحك منتهى الصلاحية

وأن إخواتى كانوا بيتعشوا باسمه

يملوا بطونهم حكاوى عليه

ويبلوا ريقهم بطعم البلح

وحلاوة المولد.. عروسة حصان

كله داب ف الشاى

والباقى يتوزع ع النمل الشقيان

لجل ما يدعو لك ويجهزوا الطريق

لرجليك المغروزة ف طين الحواديت

أول ليلة ف القبر

لقتنى بلف من غير بوصلة

وسهم تايه من غير اتجاه

ألم جماجم الشتا.. وف أول بير أنزلها

ومحدش هيعدى عليها

عشان يبيعها ف سوق العبيد

ويشتريها العزيز بثمن بخس

أول ليلة ف القبر

هنادى باأعلى صوت 

«اصحى يا نايم/ وحد الدايم

اصحى يا نايم/ وحد الرزاق»

نتسحر على نور عينينا

وف أول نفخة ف المكان

هنمسك عن الكلام.